Илдар Халиков: “Татарстанда яңа туризм индустриясе барлыгын без ачыктан-ачык әйтә алабыз”

ТР туризм буенча дәүләт комитеты рәисе Сергей Иванов Идел буе федераль округыннан РФ Мәдәният министрлыгы каршындагы Координацион совет президиумы әгъзасы итеп сайланды. Бу хакта бүген ТР Министрлар Кабинетында Координацион советның пленар утырышында РФ мәдәният министры урынбасары Алла Манилова хәбәр итте.

“Бүген иртән Координацион совет әгъзалары федераль округлар буенча утырышлар уздырдылар, эш планнары һәм нәтиҗәләре турында фикер алыштылар, һәр округның җитәкчеләрен сайладылар”, - дип белдерде РФ мәдәният министры урынбасары.

Татарстанда өлкәннәр өчен генә түгел, балалар өчен дә туризм үстерелә. Бүген Татарстан балалары илнең төрле төбәкләрендә булып, Россиядә матур шәһәрләрнең күп булуын аңлап, сокланып кайталар, дип билгеләде Илдар Халиков. “Эчке туризм – ул икътисади һәм территориаль яктан гына җайлы түгел, ә бәлки кызыклы да. Без өлкәннәр өчен генә түгел, балалар өчен дә туризмны үстерергә тырышабыз”, - дип ассызыклады ул.

Илдар Халиков 2014 елда Татарстанга 2,5 млн. турист килгәнлеген искә төшерде. “Безгә зур спорт чаралары ярдәм итә. Болар – 2013 елда Казанда узган Универсиада, быел җәй көне булачак спортның су төрләре буенча дөнья чемпионаты. Татарстанда яңа туризм индустриясе барлыгын без ачыктан-ачык әйтә алабыз. ”, - диде ул.

ТР Премьер-министры утырышта катнашучыларны тәҗрибәләр белән уртаклашырга һәм туризм өлкәсендә уңай яклардан тыш, проблемалы мәсьәләләр хакында да фикер алышырга чакырды.