ТР Премьер-министры РФ Юстиция министрлыгының ТР буенча идарәсенең яңа башлыгын тәкъдим итте

2015 елның 23 марты, дүшәмбе
Бүген Татарстан Премьер-министры Илдар Халиков РФ Юстиция министрлыгының Татарстан Республикасы буенча идарәсенең яңа башлыгын тәкъдим итте. Тантаналы чара Казанда РФ Юстиция министрлыгының Татарстан Республикасы буенча идарәсендә узды. Бу чарада РФ Юстиция министрлыгының Түбән Новгород өлкәсе буенча төп идарәсе башлыгы Елена Святкина, Татарстан Республикасы министрлыклары һәм ведомстволары башлыклары катнашты.

Виктор Демидовны яңа эшкә билгеләнүе белән котлап, Илдар Халиков, аның соңгы 10 елда Татарстан Конституцион суды рәисе булып эшләвен белдерде. “Виктор Демидовның бик яхшы юрист булуын аерым билгеләп үтәсе килә, ул җитди фәнни мәкаләләр һәм дәреслекләр авторы. Ышанам, ул яңа юнәлештә дә эшен шулай ук яхшы башкарыр. Сезгә яңа эшегездә уңышлар телибез!”, - дип өстәде ул.

Үз чиратында, Елена Святкина ассызыклаганча, Виктор Демидов төбәк буларак Татарстан спецификасы һәм дәүләт хакимияте органнары белән үзара элемтә нечкәлекләре белән яхшы таныш.

Виктор Демидов ышаныч белдергәннәре өчен коллегаларына рәхмәт белдерде, Идарә алдында торган барлык бурычлар үтәлер, дип ышандырды.

Тантана тәмамланганда Илдар Халиков Виктор Демидовка символик “министр” портфелен тапшырды.
ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International