Внешэкономбанк, KfW IPEX-Bank GmbH һәм Татарстан Республикасы Хөкүмәте үзара аңлашу турындагы Меморандумга кул куйды

“Финанс кризисы шартларында кече һәм урта эшмәкәрлекне үстерү” Форумы кысаларында “Үсеш һәм тышкы икътисади эшчәнлек банкы” (Внешэкономбанк), KfW IPEX-Bank GmbH (KfW) алман банклар төркеме һәм Татарстан Республикасы Хөкүмәте үзара аңлашу турындагы Меморандумга кул куйды.
Меморандумга Внешэкономбанк рәисенең урынбасары Михаил Копейкин, KfW Дәүләт корпорациясе вәкиллеге башлыгы Даниил Агульян һәм Татарстан Республикасының Кече һәм урта эшмәкәрлекне үстерү комитеты рәисе Тимур Шаһивәлиев кул куйды.
Меморандумның максаты – Татарстан Республикасында кече һәм урта эшмәкәрлеккә ярдәм итү өлкәсендә хезмәттәшлекне үстерү.
Беренче уртак проект буларак, ике як та Татарстан Республикасында кече һәм урта предприятиеләргә ярдәм итү өчен лизингны үстерү өлкәсендә хезмәттәшлек итүне карый.
Проект кысаларында KfW IPEX-Bank GmbH төркеме тарафыннан Внешэкономбанкның бүлендек банкларына Внешэкономбанк гарантиясе белән кредит бирү күздә тотыла. Бүлендек банклар, үз чиратында, лизинг компанияләре Татарстан Республикасындагы кече һәм урта эшмәкәрлек субъектларына алманнарның авыл хуҗалыгы һәм башка төр җиһазларын лизингка бирә алсын өчен, аларга әлеге җиһазларны сатып алуга кредит бирәчәк. Внешэкономбанкның проектны тормышка ашыруда катнашу шарты – Татарстан Республикасы Хөкүмәтенең кече һәм урта бизнес субъектларының лизинг проектларын финанслауга ярдәм итүе.
Меморандум 2009 елның июлендә төзелгән Кысалы кредит килешүен үстерү нияте белән имзаланган. Әлеге килешү, Внешэкономбанк экспорт кредит агентлыкларын иминият акчасы белән тәэмин итә алсын өчен, аңа KfW IPEX-Bank GmbH тарафыннан 500 млн евро күләмендә кредит бирүне күздә тота.
Алман банкы тарафыннан финанслану шарты белән алманнарның югары технологияле заманча җитештерү линияләрен китерү Татарстан Республикасында кече җитештерү бизнесын техника белән яңадан коралландыру мөмкинлеге бирәчәк. Беренче этапта гомуми бәясе 50 млн евро булган 55 проект финансланачак. Бу чара “озын акча”га юл ачачак, чөнки кредит сроклары 5-7 ел тәшкил итәчәк.
Программа киләсе ел башыннан эшли башлаячак.