Татарстанда "Татарстан Республикасы өчен 50 иң яхшы инновацион идея" республика конкурсы башланды

Бүген Татарстан Премьер-министры Илдар Халиков "Татарстан Республикасы өчен 50 иң яхшы инновацион идея" ел саен уздырыла торган республика конкурсына багышланган “Татарстан Республикасының Инвестиция-венчур фонды” коммерциячел булмаган оешманың попечительләр советы утырышын уздырды. Бу чара ТР Хөкүмәте йортында узды.

Утырыш барышында хәбәр ителгәнчә, 2015 елдан конкурсның рәсми оештыручысы ТР Мәгариф һәм фән министрлыгы булачак, ул "Мәгариф өлкәсендә инновацияләр" һәм "Перспектива" номинацияләре өчен җавап бирәчәк.

Шуның белән бергә конкурстан "Хезмәттәшлек" номинациясе төшереп калдырылган, ә элек "Идея-1000" инновацион проектлар программасына кертелгән "Яшьләр инновацион проекты" хәзер "Татарстан Республикасы өчен 50 иң яхшы инновацион идея" конкурсы номинацияләре составына кертелгән.

Утырышта катнашучылар шулай ук ТР Инвестиция-венчур фондының эшчәнлегенә кагылышлы докладлар тыңладылар.

Моннан тыш, утырышта Казанда 2015 елның 23-24 апрелендә узачак Х Казан һәм XV Россия венчур ярминкәләрен үткәрү турында фикер алыштылар.
Искә төшерәбез: ике юбилей чарасын берләштерү турында Россия венчур инвестицияләү ассоциациясе тәкъдим итте. Бу чара быел беренче тапкыр ике көн дәвамында узачак. Ярминкә кысаларында II халыкара "Россия төбәкләрен үстерү стратегиясе драйверлары буларак кластерлар", “Алга чыгаручы проектлар: дәүләт дәрәҗәсендә инновацион программаларны координацияләүнең яңа форматлары” бөтенроссия утырышы һәм "Татарстан Республикасынңы технологик инициативасы - "Стратегия-2030" флагман проекты" республика утырышы кебек чаралар узачак.