Татарстан Премьер-министры Рөстәм Миңнеханов Татарстан Республикасы Инвестиция-венчур фондының химаячеләр советы утырышын үткәрде

Бүген Татарстан Республикасы Министрлар Кабинетында Татарстан Республикасының хөкүмәт башлыгы Рөстәм Миңнеханов Татарстан Республикасы Инвестиция-венчур фондының химаячеләр советы утырышын үткәрде.
Утырыш барышында химаячеләр советы әгъзалары кайбер тәкъдимнәрне карадылар һәм хупладылар, Татарстан Республикасы Инвестиция-венчур фондының агымдагы эше турында докладлар тыңладылар.
Аерым алганда, “Татарстан Республикасы өчен илле иң яхшы инновацион идея” конкурсының номинацияләр санын арттыру турындагы тәкъдим хупланды. Әйтик, икътисадның өстенлекле тармакларындагы перспектив проектларны ачыклау өчен, “Наноимпульс”, “Мәгарифтә инновацияләр”, “Хезмәттәшлек” дигән яңа проектлар кертелде (Татарстаннан, Россия төбәкләре һәм чит илләрдән гариза бирүчеләрнең проектлары кабул ителә).
2009 елдан конкурсның партнеры – Россия венчур компаниясе (РВК). Ул конкурсның бүләкләү фондына 700 мең сум күләмендә акча керткән һәм конкурста катнашучы 5 иң яхшы эшмәкәрне 2010 елга Европаның иң зур технопаркларыннан берсе булган “София Антиполис” технопаркына (Франция) сәфәр белән бүләкли.
Шунысын билгеләп үттеләр: 2009 елда “Татарстан Республикасы өчен илле иң яхшы инновацион идея” конкурсында һәм “Идея-1000” инновацион проектлар программасында катнашу өчен, 1279 гариза тапшырылган. Гаризалар кабул итү Татарстан Республикасы Инвестиция-венчур фондының 20 вәкиллеге базасында оештырылган.
Татарстан Республикасы икътисадының өстенлекле тармакларындагы проектларны тормышка ашыра торган предприятиеләргә банк кредитлары буенча процент ставкасының бер өлешенә компенсация түләү хупланды.
2009 елда Татарстан Республикасының Инвестиция-венчур фонды биш оешмага 1776,8 мең сум күләмендә компенсация түләгән. Алар арасында “Чистай икмәк заводы” ААҖ, “Татхимфармпрепараты” ААҖ, “Күмәч-кондитер комбинаты” ААҖ, “Стиль” ҖЧҖ, “Казан программа чаралары җитештерү комбинаты” ААҖ бар.
Предприятиеләрнең инвестиция проектларын тормышка ашыруның барышы турындагы хисабына анализ ясау нәтиҗәләре нигезендә, ике оешмага (2008 елның 4 кварталы һәм 2009 елның 1 кварталы нәтиҗәләре буенча) 855,5 мең сум күләмендә компенсация түләүне дәвам итәргә кирәк дигән тәкъдим ясалды.
Татарстан Республикасы Премьер-министры Рөстәм Миңнеханов 20 нче декабрьгә кадәр химаячеләр советының чираттагы утырышын үткәрү планлаштырылуын әйтте. Анда фондның һәм Кече бизнес лизинг компаниясенең 2009 елдагы эшенә нәтиҗә ясалачак.