2015 елның 1 июленнән РФ Социаль иминият фонды татарстанлылар өчен түләүләрне башлый

2015 елның 1 июленнән Татарстан территориясендә РФ Социаль иминият фондының “Турыдан-туры түләүләр” (“Прямые выплаты”) пилот проекты башлана һәм пособиеләрне эш бирүчеләр түгел, ә Дәүләт учреждениесе филиаллары — РФ Социаль иминият фондының ТР буенча төбәк бүлеге түләячәк.

Бу хакта бүген ТР Хөкүмәте йортында узган брифингта РФ Социаль иминият фондының ТР буенча төбәк бүлеге идарәчесе Рамил Гыйззәтуллин хәбәр итте. Бу чара республиканың барлык муниципаль районнары белән видеоконференцэлемтә режимында узды.

Аның сүзләренчә, вакытлыча эшкә яраксызлык (больничныйлар), йөклелек һәм бала табу, йөклелекнең иртә срогында исәпкә басу, бала туган очракта, бала караган өчен, производствода зыян күргән кешегә өстәмә ял өчен түләүләр схемасы тулысынча үзгәрә.
“Проектның төп максаты – эшләүче гражданнарны, алар хезмәт куя торган оешманың матди хәленә карамастан, гарантияле дәүләт пособиеләре белән тәэмин итү”, – дип билгеләде ул.

Бүгенге көндә “Турыдан-туры түләүләр” проекты Россиянең 10 төбәгендә тормышка ашырыла. Татарстан бу проектка 1 июльдән Белгород, Ростов һәм Самара өлкәләре белән керәчәк.

“Пилот проекты барышында барлык предприятиеләр һәм оешмаларда РФ Социаль иминият фондына иминият кертемнәрен түләү системасы үзгәрә. Яңа схема буенча эш бирүчеләр мәҗбүри социаль иминиятнең ике төре буенча да тулы күләмдә иминият взнослары түләргә тиеш була”, диде Рамил Гайзатуллин.

Пособиеләрнең күләме дә, аларны исәпләү формуласы да үзгәрми, бары тик Социаль иминият фонды белән эш бирүче һәм иминиятләнгән хезмәткәр арасындагы бәйләнеш схемасы гына үзгәрә, дип ассызыклады ул.

Хезмәткәр шулай ук эш бирүчегә пособие хокукына ия булуын раслый торган документлар (эшкә яраксызлык турында кәгазь, бала туу турында белешмә яисә пособиенең төренә карап башка документлар) тапшырырга тиеш. Шулай ук хезмәткәр пособие күчерелергә тиешле банк реквизитларын яки почта адресын күрсәтеп гариза язарга тиеш була.

“Эш бирүче, үз чиратында, әлеге документларны, 5 календарь көннән дә соңга калмыйча, фондның төбәк бүлеге филиалына тапшыра. Фонд филиалы исә исәпләп чыгарып, 10 көн эчендә хезмәткәргә пособие акчасын күчерергә тиеш була”, – дип сөйләде Рамил Гайзатуллин.

Тулырак мәгълүмат белән www.fss16.ru сайтының “Турыдан-туры түләүләр” пилот проекты бүлегендә танышырга мөмкин.