Татарстан халкына ОСАГО килешүен төзегәндә хокук бозулар турында “кайнар линия”гә хәбәр итү тәкъдим ителде

Россия банкы автомобиль хуҗаларының автогражданлык җаваплылыгын мәҗбүри иминиятләштерү (ОСАГО) буенча иминият тарифларын үзгәртү турында карар кылды. Бу хакта бүген ТР Министрлар Кабинетында уздырылган брифингта РФ Үзәк банкының ТР буенча Милли банкы бүлеге идарәчесе урынбасары Марат Шәрифуллин хәбәр итте.

Аның сүзләренә караганда, иминият тарифларының үзгәрүе 1 апрельдән үз көченә кергән ОСАГО турындагы законга төзәтмәләр белән бәйле. Әлеге закон нигезендә юл-транспорт һәлакәтләрендә зыян күрүчеләрнең тормышына һәм сәламәтлегенә китерелгән тән казасы өчен иминият түләүләре 160 меңнән 500 мең сумга кадәр артты, шулай ук зыян күрүченең сәламәтлеген торгызуга юнәлдерелгән чыгымнарны каплау буенча яңа тәртип кертелде.

Иминият тарифларын үзгәрткәндә, курс аермасы белән бәйле рәвештә, автомобильләрнең запас частьләре бәяләре арту да исәпкә алынды, дип сөйләде Марат Шәрифуллин.

Чыгыш ясаучы билгеләп узганча, хәзер зыян күрүчеләрнең сәламәтлегенә салынган зарар өчен түләүләр РФ Хөкүмәте тарафыннан расланган нормативлар буенча башкарылачак. Моңа кадәр иминиятчеләр зыян күрүчегә мәҗбүри медицина иминияте кысаларында каралмаган медицина хезмәтләре буенча гына чыгымнарын каплый иде.

Марат Шәрифуллин шунысына да игътибар юнәлтте: полис бәясе генә түгел, ә иминият түләүләренең күләме дә арта. Ул иминият оешмасы төрле сәбәпләр аркасында ОСАГО килешүе төзүдән баш тартса яки ирекле булган өстәмә иминият хезмәтләрен көчләп такса, автомобиль хуҗаларына бу төр хокук бозуларны теркәргә, шул исәптән видеоязма яки шаһитләрне файдаланып, һәм РФ Үзәк банкының ТР буенча Милли банкы бүлегенә яки 292-02-67 "кайнар линия"се буенча мөрәҗәгать итәргә киңәш итте.

“Хәзерге вакытта ТР Прокуратурасы, Милли банк белән берлектә, бу төр хокук бозуларны ачыклау максатыннан, иминият оешмаларына рейдлар оештыра. Нәтиҗәдә, агымдагы елның соңгы кварталында ОСАГО килешүен төзүдән баш таркан һәм ирекле булган өстәмә иминият хезмәтләрен көчләп таккан өчен иминият компанияләрнең вазифаи затларын административ
җаваплылыкка тарту турында 12 беркетмә төзелде”, – дип сөйләде Марат Шәрифуллин. Административ хокук бозулар турындагы кодекста моның өчен 50 мең сум штраф каралган.