ТР Министрлар Кабинетында җирле үзидарә органнарының нәтиҗәлелеккә ирешүе турындагы килешү имзаланды

Бүген Татарстан Хөкүмәте йортында ТР Министрлар Кабинеты, Муниципаль берәмлекләр советы һәм ТР муниципаль районнары арасында 2015-2017 елларда республиканың муниципаль берәмлекләре җирле үзидарә органнары эшчәнлегенең нәтиҗәлелек күрсәткечләренә ирешүе турындагы килешүне имзаладылар.

Документка кул куяр алдыннан ТР Премьер-министры Илдар Халиков, Татарстанда җирле үзидарә органнарының гына түгел, ә министрлыклар һәм ведомстволарның да бердәм эшчәнлекне бәяләү мониторингы системасы формалашуын искәртте. “Бүген 2014 ел буенча 67,4 процент күләмендә төп индикаторларның үтәлешен күрәбез. Ул 2013 елдагыча”, - дип ассызыклады ул.

ТР Хөкүмәте башлыгы, 2015 елда республика җирле үзидарә органнары эшчәнлеге нәтиҗәләренә бәя бирүнең яңа системасына күчә, дип билгеләп үтте. “Татарстан Президенты йөкләмәсе буенча республика Хөкүмәте белән Муниципаль берәмлекләр советы тарафыннан муниципаль берәмлекләр башлыкларын җәлеп итеп, җитди эш башкарылган. Килешүгә өстәмә 12 күрсәткеч кертелгән. Сезнең тәкъдимнәрдә муниципаль берәмлекләр алдына куелган бурычлар чагыла иде һәм алар исәпкә алынды. Алар барысы да җирле үзидарә органнарын яхшы күрсәткечләргә стимуллаштыруны максат итеп куя”, - дип ассызыклады И.Халиков.

Татарстан икътисад министры Артем Здунов белдергәнчә, җирле үзидарә эшчәнлеген бәяләү принцибы федераль дәрәҗәдә республика эшчәнлеге бәяләнә торган индикаторларга нигезләнә. Төбәкнең федераль дәрәҗәдәге позициясе Килешүләр үтәлешенең сыйфатына бәйле”, - дип билгеләп үтте ул.

2014-2016 елларга төзелгән килешүләргә федераль күрсәткечләр һәм Татарстанның социаль-икътисадый үсеш программасы күрсәтечләренә бәйле 12 күрсәткеч кертелгән, диде Здунов. “Алар муниципаль берәмлек үсешенең төп мәсьәләләрен хәл итүгә юнәлдерелгән. Килешүдәге күрсәткечләр халыкның яшәү дәрәҗәсен, тораклы булуын, кече һәм урта эшмәкәрлекне үстерү дәрәҗәсен, транспорт инфраструктурасын, белем дәрәҗәсен чагылдыра”, - дип аңлатма бирде. 2014 ел нәтиҗәләре буенча күрсәткечләр үтәлеше уртача дәрәҗәдә, Зәй районы һәм Чаллы шәһәренең күрсәткечләре уңышлы, дип белдерде ул.

Килешүне имзалаганнан соң, Илдар Халиков, нәтиҗә ясап кына калмаска, ә яхшы күрсәткечләрне киңәшмәләрдә билгеләп үтү зарур, дигән фикер әйтте.