Илдар Халиков Кытайның Хэбэй провинциясе Эшмәкәрләр ассоциациясе делегациясе белән очрашты

ТР Премьер-министры Илдар Халиков Кытай Халык Республикасының Хэбэй провинциясе Эшмәкәрләр ассоциациясе делегациясе белән очрашты. Очрашу ТР Хөкүмәте йортында узды, анда шулай ук ТР Инвестицион үсеш агентлыгы җитәкчесе Талия Миңнуллина катнашты.

Кунакларга Татарстан Республикасының сәнәгать һәм авыл хуҗалыгы өлкәсендәге уңышлары турында кыскача сөйләп, Илдар Халиков, 2015 ел Кытай партнерлары белән элемтәләргә бай булды, дип ассызыклады. Узган атнада Казанда югары тизлекле тимер юл магистрале төзелеше проектын гамәлгә кертү өлкәсендә хезмәттәшлек буенча Россия-Кытай эшлекле төркем утырышы узды. Ә бүген “Haier” компаниясе белән сөйләшүләр башланды, ул республика территориясендә суыткыч җайланмалары җитештерү буенча завод төзергә планлаштыра, диде Илдар Халиков.

Кытай Эшмәкәрләр ассоцияциясе башлыгы Ван И билгеләгәнчә, аларның республика территориясендә гамәлгә кертергә теләгән берничә проект бар. Аерым алганда, сүз ТРның Чүпрәле районында цемент заводы төзелеше турында бара. Беренче этапта инвестор проектка 800 млн. сум кертергә әзер.

Кытай делегациясе вәкилләре шулай ук Татарстанда тире эшкәртү, медицина җайланмалары һәм агач эшкәртү эаводлары төзү буенча планнары турында сөйләделәр. Моннан тыш алар ТРның Питрәч районында теплица комплексы һәм терлекчелек фермалары төзүне дә планлаштыралар.

Илдар Халиков республика территориясендә Кытайларның бизнес-проектларын гамәлгә ашыруда ТР Хөкүмәте тарафыннан барлык кирәкле ярдәм күрсәтеләчәк, дип белдерде.