Н.Җиһанов исемендәге Казан дәүләт консерваториясе 70- еллыгын бәйрәм концерты белән билгеләп үтте

С.Сәйдәшев исемендәге зур концерт залында Н.Җиһанов исемендәге Казан дәүләт консерваториясенең 70-еллыгына багышланган тантаналы кичә узды. Бу бәйрәмгә уку йортының профессорлары, укытучылары, ветераннар, хезмәткәрләр һәм бу уку йортын тәмамлаучылар чакырылган иде.

Сәламләү сүзе белән кунакларга Казан консерваториясе ректоры Рубин Абдуллин мөрәҗәгать итте. “Консерватория 1945 елның апрелендә барлыкка килә, һәм тиз үсеш ала. Аның беренче чыгарылышы дөньяга Софья Гобәйдуллинаны бирә, алар арасында шулай ук Олег Лундстрем бар. Бүген без шулай ук Нәҗип Җиһановны искә алабыз, консерватория аның идеясе белән ачыла. Безнең консерваториядә чит ил студентлары да укый. Без Мәскәү, Санкт-Петербург консерваторияләренә, шулай ук Европа һәм АКШның музыкаль үзәкләренә конкурент булып торабыз”, - дип сөйләде ул.

Аннары ул сәхнәгә ТР Премьер-министр урынбасары Васыйл Шәйхразиевны чакырды.
“Бу юбилей безнең республика өчен генә түгел, ә бәлки бөтен Россия өчен дә әһәмиятле. Консерватория -Җиңүнең яшьтәше. Бөек Җиңү чорында туган консерватория Советлар Союзы, ә бүген Россия өчен талантлар тәрбияли. Барлык профессорларга, укытучыларга, ветераннарга рәхмәт белдерәм”, - дип билгеләде үзенең чыгышында Васыйл Шәйхразиев.

Алга таба ТР Дәүләт бүләкләре тапшырылды. Казан дәүләт консерваториясе хезмәткәрләре – Владислав Лукьянов, Вадим Афанасьев, Сарат Әхмәтов дәүләт бүләкләренә, Лилия Сәрвәрова, Земфира Сафина, Юлия Виват мактаулы исемнәргә лаек булдылар.
ТР Министрлар Кабинетының Рәхмәт хатлары Фаина Старателевага, Флюра Хәсәновага һәм Марат Зариповка тапшырылды.
Казан консерваториясе коллективына ТР Президенты вазыйфаларын вакытлыча башкаручы Рөстәм Миңнехановның Рәхмәте белдерелде.

Уку йортын бәйрәме белән шулай ук ТР Дәүләт Советы рәисе урынбасары Римма Ратникова котлады. Ул Артур Яруллин һәм Николай Шадровка ТР Дәүләт Советы рәисенең Рәхмәт хатын тапшырды.

Бу кичәдә кунаклар өчен П.Чайковский, И.Бах, А.Вивальди, Р.Яхин әсәрләре башкарылды.