Илдар Халиков Җәзаларны үтәтү федераль хезмәте директорының беренче урынбасары Анатолий Рудый белән очрашты

Бүген Татарстан Республикасы Премьер-министры Илдар Халиков Җәзаларны үтәтү федераль хезмәте директорының беренче урынбасары Анатолий Рудый белән очрашты.

Очрашу Татарстан Республикасы Хөкүмәте йортында узды. Искә төшерәбез, Анатолий Рудый Казанга Россия җәзаларны үтәтү федераль хезмәтенең Татарстан Республикасы буенча идарәсенә байрак тапшыру тантанасында катнашу өчен килде.

Очрашу барышында Илдар Халиков Россия җәзаларны үтәтү федераль хезмәтенең Татарстан буенча идарәсе өчен бу көннең истәлекле булуын билгеләде. Республика идарәсе бу байракка лаек, диде ул.

Үз чиратында, Анатолий Рудый Татарстан Республикасы җитәкчелегенә, Татарстанның төзәтү учреждениеләренә ярдәм күрсәткән өчен рәхмәт белдерде. “2015 елның беренче кварталында гына да Татарстан безнең учреждениеләргә 6 млн. сум күләмендә ярдәм күрсәтте. Төзәтү учреждениеләрендә дә безнең гражданнар, нәтиҗәдә безнең җәмгыятькә әйләнеп кайтачаклар. Аларның гадәти тормышка җайлашуына, һөнәр алуына юнәлтелгән эшләр башкару бик мөһим”, - диде ул.