Минтимер Шәймиев халыкара кунакханәләр челтәре вәкилләре белән очрашулар уздырды

Татарстан Республикасы Дәүләт Киңәшчесе, “Яңарыш” фонды Попечительлек советы рәисе Минтимер Шәймиев кичә кич Казан Кремлендә Marriott International һәм Accor Group халыкара кунакханәләр челтәре вәкилләре белән очрашулар уздырды.

Очрашулар Болгарда кунакханә комплексы белән идарә итү системасын билгеләү максатыннан уздырылды, аның нигезенә беренче таш тантаналы рәвештә 27 апрельдә Рөстәм Миңнеханов һәм Минтимер Шәймиев тарафыннан салынган иде.

Очрашуда катнашучыларны Marriott компаниясенең Россиядәге һәм БДБ илләрендәге үсеш буенча директоры Иван Кисеев һәм «Альянс Отель Менеджмент» идарәче партнеры Вадим Прасов Россиядә үз компанияләренең эшчәнлеге белән таныштырдылар. Алар Болгарда булдылар, төзелеш урынын карап, комплексның проекты белән таныштылар һәм аның белән идарә итүне оештыру буенча тәкъдимнәрен белдерделәр.

Соңрак Минтимер Шәймиев Россия, Грузия һәм БДБдә Accor Groupның Хотелсервис үсеше буенча директор урынбасары Алексис Фейя белән очрашты.

Алексис Фейя борынгы Болгар шәһәрендә алган тәэсирләре белән уртаклашты, Accor Group челтәренең Татарстандагы эшчәнлек тәҗрибәсе һәм челтәрнең заманча системасы мөмкинлекләре турында сөйләде. Бу мөмкинлекләрне Болгар кунакханәсе эшен оештырганда файдаланырга мөмкин булуын белдерде.

Очрашуда ТР Дәүләт Советы рәисе урынбасары, “Яңарыш” республика фондының башкарма директоры Татьяна Ларионова, Татарстан Республикасының Туризм буенча дәүләт комитеты рәисе Сергей Иванов, «Татинвестгражданпроект» ДУП генераль директоры Гадел Хөснетдинов катнашты.