Рөстәм Миңнехановның кушуы буенча ТР Премьер-министры Илдар Халиков ТРның табигатьне саклау зоналарын тәртипкә китерү мәсьәләләре буенча киңәшмә уздырды

Татарстан Республикасы Премьер-министры Илдар Халиков бүген ТРның табигатьне саклау зоналарын тәртипкә китерү мәсьәләләре буенча киңәшмә уздырды. Киңәшмә ТР Хөкүмәте йортында узды. Анда ТР экология һәм табигый ресурслар министры Артем Сидоров, Казан каласы Башкарма комитеты җитәкчесе Денис Калинкин, Казан районара табигатьне саклау прокуратурасы башлыгы Олег Дәминов катнашты.
Моннан тыш, видеоконференцэлемтә режимында узган киңәшмәдә Лаеш, Тукай, Яшел Үзән муниципаль районнары вәкилләре катнашты.

Киңәшмә ТР Президенты вазыйфаларын вакытлыча башкаручы Рөстәм Миңнеханов кушуы буенча уздырыла, дип хәбәр итте Илдар Халиков.
“Рөстәм Миңнеханов кушуы буенча без кыска вакытта закон кысаларында елгаларның табигатьне саклау зоналарын тәртипкә китерү чаралары планын эшләргә тиеш, диде ул. Кызганычка каршы, 2014-2015 елларда яр буе полосаларын дөрес файдаланмау, елгаларның табигатьне саклау зоналарын пычрату, шулай ук республикада яшәүчеләр өчен елга буйларының тиешле дәрҗәдә төзекләндерелмәве турында мөрәҗәгатьләр булды. Бу мәсьәләләр республиканың күп кенә районнарына, шул исәптән Казанга, шулай ук Тукай, Лаеш, Яшел Үзән муниципаль районнарына да кагыла”, - диде ул.

ТР Премьер-министры билгеләгәнчә, бу темага караган материаллар табигатьне саклау прокуратурасына һәм ТР Экология һәм табигый ресурслар министрлыгына килгән. “Бер атна эчендә барлык мөрәҗәгатьләр исемлеген әзерләүне сорыйм”, - дип белдерде Илдар Халиков.
Бу тема буенча фикер алышуга иҗтимагый оешмаларны җәлеп итү мөһим, дип ачыклады ул.

Илдар Халиков, ТР Президенты вазыйфаларын вакытлыча башкаручы Рөстәм Миңнеханов кичә, 2016 елны Идел һәм Кама су саклау зоналары елы булуын игълан итте, дип искә төшерде.
“Киләсе 2016 ел елгаларыбыз яр буе полосалары территорияләрен төзекләндерү, Су саклау зоналарын үстерү өчен уңайлы шартлар булдыруга юнәлдереләчәк”, - дип ачыклык кертте ул.

Киңәшмәдә катнашкан муниципаль берәмлекләрнең җитәкчеләренә мөрәҗәгать итеп, ТР Премьер-министры аларны инициатива күрсәтергә чакырды һәм бу мәсьәлә буенча сораулар һәм тәкъдимнәрне ТР Экология һәм табигый ресурслар министрлыгына җибәрергә кушты.

Муниципаль районнар вәкилләре киңәшмә барышында табигатьне саклау зоналарын тәртипкә китерү мәсьәләләре бик актуаль, дип билгеләделәр. Алар ял итү зоналарын төзекләндерүгә инвесторларны җәлеп итү мөмкинлеген карауны тәкъдим иттеләр.