Казанда студентлар Җиңү маршы узды

Бүген Казан (Идел буе) федераль университетының төп бинасы каршында Бөек Җиңүнең 70 еллыгына багышланган митинг булды. Анда ТР Премьер-министры Илдар Халиков, ТР парламенты депутатлары, республика министрлыклары һәм ведомстволары вәкилләре, шулай ук КФУда белем алучы 3 меңләп студент катнашты.

Илшат Гафуров: "Ватаныбызны саклауда университетыбызның күп кенә студентлары һәм педагоглары дошман белән көрәшкә кузгалды һәм аларның күбесе үзләренең гомерләрен бирде, безне фашизмнан саклап калды. Җиңү, ирек, тыныч күгебез өчен рәхмәт сезгә! - диде чарага килгән ветераннарга мөрәҗгать итеп һәм бүген КФУ бакчасында мемориаль такта ачылуын, ветераннар хөрмәтенә бакчада агачлар утыртылуын искәртте. - Казан университеты үзенең тамырлары белән еракка барып тоташа, әмма яшь булып калуыннан туктамый. Бүгенге акция дә университетның студентлар активы инициативасы белән уздырыла. 70 ел элек тә студентлар бердәмлеге Җиңүгә китергән. Безнең халыкны беркем дә сындыра алмаячак!" - диде ул чыгышында.

КФУның юридик факультетын тәмамлаган Илдар Халиков: "Бүген без бу Җиңүне яулап алган ветераннарыбызны тәбриклибез. Сугыш башланганнан соң, университетның меңләп студенты һәм йөзләгән укытучысы сугыш кырына киткән һәм күбесе аннан кайтмыйча, ятып калган. Бүген 70 ел элек безгә үз киләчәгебезне үзебезгә хәл итәргә мөмкинлек биргән, Европаны коткарган, тынычлык һәм бәхет чаткылары кабызганнарга хөрмәт күрсәтергә җыелдык. Бөек Ватан сугышы хакында хатирәләрне саклау яшь буында ил мирасына карата хөрмәт хисләрен тәрбияләргә ярдәм итә. Ветераннар яшь буында ватанпәрвәрлек хисләрен тәрбияләүдә бик зур эш башкара. Безнең уртак максатыбыз - яңа буынга Казан университеты студентларының һәм укытучыларының Бөек Ватан сугышында кылган батырлыкларын җиткерү. Үз эшчәнлегебез белән без илгә булган ватанпәрвәрлекне күрсәтергә тиеш", - диде. И.Халиков билгеләп үткәнчә, Казан федераль университеты бу өлкәдә зур уңышларга иреште. Әлеге университетта белем алганнар Россиядә һәм Татарстанда Җиңү көне уаенннан уздырыла торган бик күп проектларда катнаша һәм бүгенге марш шуңа мисал булып тора. Университет киләчәктә дә фәндә һәм укуда зур уңышларга ирешер дип уйлыйм, диде ул.

Сугыш ветераны, бик күп хәрби бүләкләр иясе Владимир Смирнов: "Без 70 ел дәвамында 1941ел хакында истә тоттык. Дөнья фашизмга каршы тора алырлык көч юк дип саный иде, әмма без аларга каршы тора алдык. Советлар Союзының 26 миллион кешесе үз гомерен шул Җиңүгә бирде, илебезнең икътисады 20 елга артта калды. Яшь буын, мин сезнең тормышыгыз яхшылык, мәхәббәт һәм алга омтылыш белән тулы булуын телим", - диде.

Шуннан соң сугышта һәлак булганнар истәлегенә бер минутлык тынлык игълан ителде. Чара тынычлык символы булган 70 ак күгәрченне һәм сугыш дәвам иткән 1417 көн билгесе буларак шул кадәр үк кызыл шарларны күккә очыру белән тәмамланды.