Татарстаннан 214,9 мең бала өчен ял итү оештырылачак

Агымдагы елда җәйге каникуллар чорында Татарстанда барлыгы 214 мең 921 баланы төрле ял һәм сәламәтләндерү формалары белән колачлау ниятләнә. Узган елда республикада 212 мең 617 бала төрле лагерьларда ял иткән. Әлеге саннарны бүген ТР Министрлар Кабинетында узган брифингта ТР яшьләр эшләре һәм спорт министры урынбасары Рөстәм Гарифуллин җиткерде.

Балаларны ял иттерүгә ТР бюджетыннан быел 1 млрд 281,33 млн сум акча бүлеп биреләчәк, бу, 2014 нче ел белән чагыштырганда, 5 процентка артык (узган елда бу максатларга 1 219, 16 млн сум бирелгән иде).

Шуны да билгеләп узарга кирәк: быел катлаулы тормыш шартларына дучар булган балаларның ялына һәм сәламәтләндерүгә Россия Федерациясе бюджетыннан акча бүлеп бирү туктатылган. Былтыр ил казнасыннан 56,6 млн сум акча каралган булган. РФ Хөкүмәте Рәисе Дмитрий Медведев йөкләмәсе буенча, быел төбәк бюджетыннан бу максатларга 60,7 млн сум акча юнәлдерелгән.

“2015 нче ел программасы социаль юнәлешен саклап кала: 420,13 млн сум күләмендә 49 мең 895 бушлай юллама каралган, шул исәптән 3100 – тернәкләндерү дәвалавына мохтаҗ балалар; 9485 – катлаулы тормыш шартларына дучар булган балалар; 3000 – хәрби-патриотик чатыр лагерьлары; 2000 – тәртипләре тайпылышлы балалар өчен; 31270 – сәләтле балалар, олимпиада, спорт ярышлары призерлары, волонтерлар; 1040 – кадетлар һәм сәләтле балалар (Кара диңгез яры буендагы сменаларда)”, - дип билгеләп үтте Рөстәм Гарифуллин.

Быел стационар лагерьга юлламаның норматив бәясе – 14 мең сум (21 көнгә), профильле стационар лагерьга – 12 мең сум (18 көнгә), чатыр лагерена – 5 мең 537 сум (7 көнгә), Кырым һәм Краснодар крае Кара диңгез яры буенда урнашкан лагерьга – 17 мең 146 сум (18 көнгә), санатор-курорт учреждениесенә – 25 мең 932 сум (24 көнгә).

Ата-аналар взносы һәм юллама чыгымының бер өлешен ТР бюджетыннан компенсацияләү тәртибе үзгәрешсез кала: бюджет оешмалары хезмәткәрләре балалары өчен – 85 процент (15 процент – ата-ана взносы); профильле сменаларга һәм чатыр лагерьларына, шул исәптән Кара диңгез яры буендагы сменалар – 85 процент (юлга тотылган чыгымнарны исәпкә алмыйча, 15 процент – ата-ана акчасы); бюджеттан тыш оешма, шул исәптән федераль учреждение
хезмәткәрләре балалары өчен – 42, 5 процент (42,5 процент – предприятие акчасы, 15 процент – ата-ана взносы); катлаулы тормыш шартларына дучар булган аз керемле гаилә балалары, сәләтле, ятим балалар өчен, хроник чире булган балаларга тернәкләндерү дәвалавы өчен юлламалар, шулай ук “Мать и дитя” юлламасы бәяләре 100 процент күләмендә республика казнасыннан тәэмин ителә. Лагерь программасының уңайлылыгы һәм эчтәлегенә карап, ата-аналар керткән акча 2 мең сумнан алып 9 мең сумга кадәр тәшкил итәчәк.