Илдар Халиков: Татарстанның үсеше сулыкларны сәламәтләндерү буенча чараларны гамәлгә кертмичә мөмкин түгел

Татарстанның үсеше сулыкларны сәламәтләндерү буенча чараларны гамәлгә кертмичә мөмкин түгел. Бу хакта бүген Татарстан Премьер-министры Илдар Халиков Казанда узган Идел төбәкара табигатьне саклау прокуратурасының түгәрәк өстәл киңәшмәсендә белдерде. Бу чара Казан ратушасында узды. Шулай ук киңәшмәдә РФ Генераль прокуроры урынбасары Сергей Зайцев, Идел төбәкара табигатьне саклау прокуроры Вениамин Селифанов, РФ субъектлары прокуроролары, Россиянең төрле төбәкләреннән дәүләт хакимияте органнары вәкиллләре катнашты.

Кунакларны сәламләп, Илдар Халиков, Татарстан Россиянең иң зур сәнәгый төбәкләренең берсе, дип белдерде. “Сулыкларның агынты сулар белән пычрануы һәм су-биологик ресурсларның торышы бик куркыныч тудыра”, - диде ТР Премьер-министры.

Илдар Халиков ассызыклаганча, Татарстанның үсеше җирле сулыкларны сәламәтләндерү буенча чараларны гамәлгә кертмичә мөмкин түгел. “Федераль су ресурслары агентлыгы ярдәме белән гидротехник корылмаларны тиешле хәлгә китерү мәсьәләләре уңышлы алып барыла. Куйбышев һәм Түбән Кама сусаклагычларының эшләү режимы безнең өчен бик мөһим”, - дип билгеләде ул.

ТР Президенты тарафыннан 2016 елны республикада Идел һәм Кама сусаклау зоналары елы итеп игълан итү карары кабул ителгән. Илдар Халиков сүзләренчә, бүген бу мәсьәләләр буенча чараларның планы эшләнә.

Вениамин Селифанов үзенең чыгышында Идел буенда Россиянең 70% химия, нефть эшкәртү, нефть химиясе предприятиеләре урнашкан, дип белдерде. Аның сүзләренчә, Идел буе экологик начар территорияләрдән санала.

Ул киңәшмәдә катнашучыларга Идел бассейны төбәкләренең экологик куркынычсызлыгын тәэмин итү мәсьәләләренә дәүләт хакимияте органнары һәм җирле үзидарәләрнең аерым игътибар бирүе хакында сөйләде.