Дмитрий Ливанов: “Россиядә WorldSkills стандартларын тарату мөһим”

Бүген “Казан ярминкәсе” күргәзмә үзәгендә узган пленар утырышта “Яңа Россия өчен яңа кадрлар: тенденцияләр, чакырулар, мөнәсәбәтләр” темасы буенча фикер алыштылар. Утырыш "WorldSkills" стандартлары буенча III илкүләм һөнәри осталык чемпионаты финалы кысаларында узды.
Искәртеп үтик, кичә чемпионат финалының тантаналы ачылышы узды.
Пленар утырышта РФ хезмәт һәм социаль яклау министры Максим Топилин, РФ мәгариф һәм фән министры Дмитрий Ливанов, ТР Премьер-министры Илдар Халиков һ.б. катнашты.

РФ хезмәт һәм социаль яклау министры Максим Топилин, чемпионатта “Яшьләр күп, димәк, уңай идеяләр һәм күтәренке кәеф булачак”, дип билгеләп үтте. “Бүген без күргәннәрдән – беренчедән, ул яшьләрнең яңа һөнәр һәм квалификация алу теләге, икенчедән, ул безнең теория буенча нәрсәдер аңлата белү һәм һөнәри стандартларны белдерү генә түгел, ә аны матур күрсәтә һәм эшли белү дә”, - диде ул һәм яшьләрне кызыксындыра белү мөһим дип өстәде.
Ул чыгышында берничә теманы кузгатты, шулай ук һөнәри стандартлар турында да сүз булды. Аның сүзләренчә, аларны эш белән тәэмин итүче формалаштырырга һәм һөнәри бергәлек тарафыннан расланырга тиеш.
Моннан тыш, Максим Топилин квалификацияне мөстәкыйль бәяләү системасының мөһимлегенә игътибарны юнәлтте. Хәзер бу система эшләнелә. “Квалификацияне бәяләү үзәкләре эш белән тәэмин итүчеләрне берләштерә торган структуралар тарафыннан гамәлгә куелырга тиеш”, - дип билгеләп үтте ул.
WorldSkills хәрәкәте, барыннан да элек, яшьләрне теге яки бу һөнәр буенча белем алырга кызыксындыра, дип билгеләп үтте ул.

РФ мәгариф һәм фән министры Дмитрий Ливанов, WorldSkills чемпионаты финалының икенче тапкыр Казанда үткәрелүенә игътибарны юнәлтте. “Бу республика җитәкчелегенең һөнәри белем бирү системасына нинди дәрәҗәдә игътибарлы булуын дәлилли, - дип белдерде ул. – Татарстан – мәктәптә, югары һәм һөнәри белем бирү өлкәсендә лидерларның берсе. Бу республика җитәкчелегенең мәгарифне үстерүгә биргән игътибары һәм инвестицияләре нәтиҗәсе”.
Дмитрий Ливанов билгеләп үткәнчә, икътисади үсешне тоткарлаучы факторларның берсе югары квалификацияле эшчеләрнең җитмәве яки эре инвестицион проектлар гамәлгә куючы компанияләрдәге дефицит. Мәгариф системасының бурычы – бу чакыруларга адекват җавап.
Якын арада иң яхшы халыкара практикалар нигезендә һөнәри стандартлар буенча федераль мәгариф стандартлары үткәрү мөһим. Шуңа күрә WorldSkills стандартларын тарату зарур, дип саный РФ мәгариф һәм фән министры.

ТР Премьер-министры Илдар Халиков, соңгы 2 елда WorldSkills хәрәкәте турында күпләр белде, ә WorldSkills International ассоциациясе 1946 елда гамәлгә куелган, дип белдерде.
“Ничек шулай килеп чыгуын әйтә алмыйм. Кичә ачылышта Россия Хөкүмәте Рәисе урынбасары Ольга Голодец, бүген пленар утырышта ике федераль министрның катнашуы Россиядә бу хәрәкәткә хәзерге мөнәсәбәт турында сөйли”, - диде И.Халиков.
Аның сүзләренчә, элек кулланылмаган мөмкинлекләрне кыска вакытта торгызу зарур. WorldSkills стандартларын кабул итү – Татарстан алдында торган бурычларны берсе. “Мондый чемпионат безнең мәйданчыкта узганда, ул катнашучылар, предприятие-партнерлар, балалар санын арттыру мөмкинлеген бирә. Конкурс сынаулары уза торган мәйданчыкта 50 меңнән артык бала узачак”, - диде И.Халиков.
“Бер ел элек җитәкчеләргә чемпионатта нигә катнашырга икәнлеген аңлатырга авыр иде. Быел башкачарак, әмма камиллеккә ерак әле. Без үзләрен күрсәтү өчен бирегә килгән чит ил компанияләрен күрдек. Бу мәйданчыкта аларның Россия көндәшләре нигә юк дигән сорау туа. Тиздән үзгәреш булыр, дип уйлыйм”, диде ул партнер-предприятиеләр хакында.