Илдар Халиков: Татарстан халкының мәдәни һәм рухи гадәтләрен саклау һәм арттыру безнең төп бурычыбыз булып тора

Бүген Татарстан Республикасы Премьер-министры Илдар Халиков Халыкара Төрки академия һәм Төркия Фәннәр академиясе президентлары белән очрашты. Бу чара ТР Хөкүмәте йортында узды.

Очрашуда шулай ук ТР Премьер-министры урынбасары - ТР мәгариф һәм фән министры Энгель Фәттахов, ТР Фәннәр академиясе президенты Мәгъзүм Сәләхов катнашты.

Илдар Халиков кунакларны сәламләп, Татарстан халкының мәдәни һәм рухи гадәтләрен саклау һәм арттыру безнең иң мөһим бурычыбыз булып тора, дип ассызыклады. “ Соңгы елларда республикада, илебездә һәм бөтен дөньяда бу эшнең кирәклеге турында ешрак сөйләүләре мине шатландыра”, - дип өстәде Премьер-министр.

Илдар Халиков ТР Фәннәр академиясенең милли үзаңны ныгыту өлкәсендәге эшен югары бәяләде. “Безнең бу мәсьәләдә казакъ коллегаларыбыз белән хезмәттәшлек тәҗрибәбез зур. Бу бергәләп китаплар бастыру, конференцияләр уздыру. Мондый тыгыз элемтәләр инде күп еллар дәвам итә”,- диде ул.

ТР Премьер-министры сүзләренчә, шундый ук мөнәсәбәтләр бүген ТР Фәннәр академиясе һәм Төркия Фәннәр академиясе арасында урнаша башлады. Халыкара Төрки академия һәм Төркия Фәннәр академиясе танылган халыкара институтлар санала, шуңа күрә фәнни оешмалар арасында тәҗрибә алмашу өчен теләсә нинди мөмкинлектән файдаланырга кирәк.