ТР Премьер-министры Илдар Халиков: “Безнең Колумбия белән товар әйләнеше, хәзергегә караганда, күбрәк була ала”

Безнең Колумбия белән товар әйләнеше, хәзергегә караганда, күбрәк була ала. Бу хакта бүген ТР Премьер-министры Илдар Халиков Колумбия-Россия палатасы җитәкчесе Оскар Лопес Боланьос җитәкчелегендәге Колумбия делегациясе әгъзалары белән очрашуда белдерде.

Очрашу ТР Хөкүмәте йортында узды. Анда ТР Премьер-министры ярдәмчесе Назил Насыйбуллин, ТР Инвестицион үсеш агентлыгы җитәкчесе Талия Миңнуллина, ТР сәнәгать һәм сәүдә министрының беренче урынбасары Руслан Кәбиров, ТР Сәүдә-сәнәгать палатасы идарәсе рәисе Шамил Агеев һ.б. катнашты.

Колумбия делегациясенең Татарстанга килүе ТР Президенты вазыйфаларын вакытлыча башкаручы Рөстәм Миңнеханов чакыруы буенча узды, диде Илдар Халиков.

ТР Премьер-министры Колумбия вәкилләренә Татарстан Республикасы һәм аның сәнәгать потенциалы белән кызыксынулары өчен рәхмәт белдерде.

Алга таба ТР Премьер-министры бүген республика территориясендә оештырыла торган кызыклы проектлар турында җентекләп сөйләде. Шул исәптә “Алабуга” МИЗы, “Иннополис инновацион шәһәре, күпсанлы сәнәгать зоналары һәм технопарклары.

Илдар Халиков шулай ук Татарстан вузларында Колумбия студентлары укуын хәбәр итте, мәгариф һәм фән өлкәсендә хезмәттәшлекнең дәвам итәчәгенә ышаныч белдерде.

Үз чиратында Оскар Лопес Боланьос Колумбия бизнесы вәкилләре өчен Казанга килүне оештырган өчен рәхмәт белдерде һәм очрашуда катнашучылар белән таныштырды. Делегация составында туризм өлкәсендә (Tavi Travel), авиация сәнәгатендә инженерлык хезмәтләрен тәэмин итү буенча (Sis Soluciones Integrales, Aserpa), аграр-индустриаль сектор продуктларын коммерциализацияләү (Industrial de Alistamiento), төзелеш өлкәсендә һәм күпләп кулланыла торган инновацион продуктларны коммерциализацияләү (Consruespeciales) өлкәсендә эшләүче компания вәкилләре бар.