Илдар Халиков: Татарстан һәм Финляндия арасындагы мөнәсәбәтләр уңай бара

Татарстан һәм Финляндия арасында мөнәсәбәтләр уңай бара. Бу хакта Татарстан Республикасы Премьер-министры Илдар Халиков бүген ТР Хөкүмәт йортында узган Финляндия Республикасы делегациясе вәкилләре белән очрашуда белдерде.

Илдар Халиков кунакларны сәламләп, Татарстанны Финляндия белән эшлекле элемтәләрне киңәйтү кызыксындыра, дип билгеләде. Безнең үзара хезмәттәшлек өчен зур потенциал бар, аннан файдаланырга кирәк, дип саный ул.

Хезмәттәшлек итү өчен иң перспективалы юнәлешләр буларак, Илдар Халиков, сәүдә, сәнәгать, төзелеш һәм туризм өлкәләрен атады. Аның сүзләренә караганда, Финляндия компанияләре Татарстан базарында үзләрен яхшы яктан күрсәтте. Уртак проектларны гамәлгә ашыру киләчәктә дә дәвам итәр, дигән ышаныч белдерде ул.

Очрашуда шулай ук ТР Премьер-министры урынбасары – ТР сәнәгать һәм сәүдә министры Равил Зарипов, ТР төзелеш, архитектура һәм ТКХ министры Ирек Фәйзуллин, ТР транспорт һәм юл хуҗалыгы министры Ленар Сафин һәм республика ведомстволары вәкилләре катнашты.

Искә төшерәбез, Финляндия делегациясенең Казанда булуы 10 июньгә кадәр дәвам итә. Кунаклар бу вакыт эчендә Татарстан предприятиеләре вәкилләре белән эшлекле очрашулар уздырырга планлаштыра.