Иннополиста Бөтенроссия робот техникасы олимпиадасында РФнең 45 төбәгеннән 790 кеше катнашты

Бүген ТР Хөкүмәте йортында брифингта Иннополиста узган Бөтенроссия робот техникасы олимпиадасына нәтиҗә ясадылар. Төп докладны ТР Премьер-министры урынбасары - ТР мәгълүматлаштыру һәм элемтә министры Роман Шәйхетдинов ясады. Шулай ук ММЧ вәкилләре белән очрашуда Иннополис университетының югары уку йортына кадәрге белем бирү буенча проректоры Сергей Масягин катнашты. Брифинг ТРның барлык муниципаль районнары белән видеоконференция режимында узды.

Быел Бөтенроссия робот техникасы олимпиадасы 2015 елның 8-10 июнь көннәрендә яңа Иннополис шәһәрендә уздырылды. Роман Шәйхетдинов сүзләренчә, мондый чара сәләтле яшьләрне ачыклау һәм мәгълүмат технологияләрен популярлаштыру максаты белән эшләнә.

Быел Бөтенроссия робот техникасы олимпиадасында катнашучыларның саны сизелерлек артты, Россиянең 45 төбәгеннән 790 кеше көч сынашты, дип билгеләде министр. Татарстан данын Казан, Чаллы, Алабуга, Бөгелмә, Нурлат, Урыссу, Байлар Сабасыннан барлыгы 23 команда яклады.

Олимпиада нәтиҗәләре буенча Санкт-Петербург, Мәскәү, Свердловск өлкәсе вәкилләре алдынгы урыннарны яулады. Татарстаннан Нурлат командасы кече яшьтәгеләр төркемендә “Лабиринт: туда-обратно” категориясендә беренче урынны алды.

“Бөтендөнья олимпиадасында катнашу алдыннан без укыту-өйрәтүләр уздырырга планлаштырабыз, ул шулай ук Иннополиста узачак. Сайлау нәтиҗәләре буенча команда составлары билгеләнәчәк, алар Катарда уздырылачак халыкара олимпиадада катнашачак”, - дип хәбәр итте Роман Шәйхетдинов.

“Шулай ук 2018 елда робот техникасы буенча халыкара олимпиаданы Казанда уздыру өчен гариза бирергә планлаштырабыз. Искә төшерәм, 2016 елда Татарстан башкаласында информатика буенча бөтендөнья олимпиадасы узачак”, - дип йомгаклады Роман Шәйхетдинов.