Рөстәм Миңнеханов һәм “Росатом” ДК генераль директоры Сергей Кириенко хезмәттәшлек турында килешү имзаладылар
Бүген Петербург халыкара икътисадый форумы кысаларында “Росатом” атом энергетикасы буенча Дәүләт корпорациясе һәм Татарстан Республикасы арасында хезмәттәшлек турында килешү имзаланды.
Документка имзаларын Татарстан Республикасы Президенты вазыйфаларын вакытлыча башкаручы Рөстәм Миңнеханов һәм “Росатом” ДК генераль директоры Сергей Кириенко куйдылар.
Хезмәттәшлек турында килешү атом төш, радиация һәм экология иминлеген тәэмин итү белән бәйле федераль, ведомство һәм региональ дәүләт сәнәгать, социаль һәм экология программаларын гамәлгә ашыруга юнәлдерелгән.
Яклар хезмәттәшлеге Татарстан Республикасының энергетика һәм икътисадый иминлеген арттыруга, икътисадый һәм фәнни-техник багланышларга, төбәкнең социаль-икътисадый үсешен тәэмин итүгә һәм Татарстан Республикасының минераль-чимал ресурсларын нәтиҗәле үзләштерүгә юнәлдерелгән өлкәләрдә алып барылачак дип көтелә.
Моннан тыш, килешү кысаларында Татарстан Республикасының белем бирү учреждение укучылары һәм халкына атом энергиясен куллану мәсьәләләре буенча мәгълүмати, мәгариф һәм белем бирү программалары гамәлгә ашырылачак.