Илдар Халиков Хәтер һәм кайгы көненә багышланган митингта катнашты

Бүген Татарстан Республикасы Премьер-министры Илдар Халиков 1941-1945 еллардагы Бөек Ватан сугышы башлануга 74 ел тулуга багышланган митингта катнашты. Бу чара Казанның Җиңү паркында узды.
Митингта шулай ук ТР Президенты ярдәмчесе Ләйлә Фазлыева, Казан шәһәре башкарма комитеты җитәкчесе Денис Калинкин, ТРның хәрби комиссары Сергей Погодин, сугыш ветераннары һәм тыл хезмәтчәннәре һ.б. катнашты.

Митингны ачып, Илдар Халиков, 22 июньнең Россия тарихында иң кайгылы көн булуын билгеләде. "Бу көнне дәһшәтле канкойгыч сугыш башланды. Безнең җиңүебез бик зур югалтулар бәрабәренә ирешелде: дистәләгән миллион кешенең гомере өзелде, шәһәр һәм авыллар җимерелде, тарихи һәм мәдәни һәйкәлләр юк ителде һәм илдән алып кителде, Ленинград блокадасындагы ачлык, концлагерьлар афәте. Бу яралар беркайчан да төзәлмәс", - дип ассызыклады Илдар Халиков.

Сугыш елларында 700 мең татарстанлы фронтка киткән, аларның яртысы сугыш кырларында ятып калган. "Бөек Җиңү өчен бөтен ил тырышты. Без тылда хезмәт итүчеләргә бик рәхмәтлебез. Сугыш елларындагы батырлык, фидакарьлек өчен 300дән артык татарстанлы Советлар Союзы Герое исеменә лаек булды һәм өченче дәрәҗә Дан орденының тулы кавалерлары булды” – дип өстәде Илдар Халиков.

"Кадерле дуслар! Бүгенге хәтер һәм кайгы көнендә барыгызга да тынычлык, бәхет һәм сәламәтлек телим", - диде Илдар Халиков.

Митингта шулай ук Советлар Союзы Герое Борис Кузнецов, концлагерь тоткыннары һәм яшьләр хәрби-патриотик оешма вәкилләре чыгыш ясады. Аннан соң, митингта катнашучылар Бөек Ватан сугышында һәлак булучыларны бер минутлык тынлык белән искә алды.

Алга таба Илдар Халиков Дан мемориалы колоннадасының Мәңгелек утына чәчәкләр салды.