Минтимер Шәймиев: “Бүген Зөя утрау-шәһәрендә эш кайный”

Бүген Татарстан Республикасы Дәүләт Киңәшчесе, Республика тарих һәм мәдәният һәйкәлләрен яңадан торгызу фонды Попечительләр советы рәисе Минтимер Шәймиев Зөя утрау-шәһәренә эш сәфәре кылды, ул анда төзелүче һәм реставрацияләнүче объектларны карады.

Аны ТР Дәүләт Советы Рәисе урынбасары, "Яңарыш" фонды башкаручы директоры Татьяна Ларионова, ТР Яшел Үзән районы башлыгы Александр Тыгин, ТР транспорт һәм юл хуҗалыгы министры Ленар Сафин, ТР мәдәният министры Айрат Сибагатуллин, ТР Дәүләт Советы депутаты, Зөя Успение-Богородица монастыре игумены Силуан, "Зөя утрау-шәһәре" Дәүләт тарихи-архитектура һәм сәнгать музее директоры Артем Силкин һәм подряд һәм проект оешмалары җитәкчеләре озатып йөрде.

Минтимер Шәймиев иң беренче булып Зөя шәһәренә кергән вакытта юлларны киңәйтү эше барышы белән танышты. Биредә вертолет мәйданчыгы һәм парковка булачак. Юл Республика көненә салынып бетәчәк, дип ышандырдылар ТР Дәүләт Киңәшчесен.

Аннары мәртәбәле кунаклар яр буенча китте, анда Зөя җилкәнле туристлык үзәге төзү ниятләнә. Биредә ял итәргә килүчеләрне җилкәнле яхта һәм ишкәкле көймәдә йөзәргә өйрәтәчәкләр. М.Шәймиев андый үзәк төзү фикерен хуплады.

Алга таба аңа сквер проектын күрсәттеләр, аны Елга вокзалы янындагы мәйданда төзи башлаганнар инде. ТР Президенты Указы белән 2015 ел Парклар һәм скверлар елы дип игълан ителде. "Яңарыш" фонды башлангычы белән әлеге зур күләмле чара кысаларында, Болгар һәм Зөядә тематик скверлар төзү эшенә керештеләр. Сквер Республика көне - 30 августка төзелеп бетәчәк, дип вәгъдә итте төзүчеләр.

Киләсе объект - "Татар бистәсе" археологик казу эшләре урыны - булачак агач археологиясе музее мәйданы.

Искәртеп узабыз: утрауда ярларны ныгыту белән бәйле саклау-кыр эшләре нәтиҗәсендә урта гасырларда төзелгән агач биналар комплексы ачылды. А.Халиков исемендәге Археология институты директоры Айрат Ситдиков музей оештыру эшләре барышы турында җентекләп сөйләде.

Минтимер Шәймиев шулай ук Зөя Богородица-Успение монастыре - федераль дәрәҗәдәге мәдәни мирас объектында да булды. Ул анда рәссам-реставраторлар белән аралашты. "Хәзерге вакытта без ЮНЕСКО исемлегенә тәкъдим итү өчен Зөя номинациясе өстендә эшлибез. Белгечләрнең карашы Успение соборына төбәлгән, дияр идем. Алар бәяләгәнчә, фреска язуларының үзләре һәм сурәтләр аеруча кыйммәт", - диде Минтимер Шәймиев. Собор һәм фреска язуларын реставрацияләү 2010 елдан бирле башкарыла.

ТР Дәүләт Киңәшчесе Зөя Богородица-Успение монастыренең Изге Николай чиркәвен торгызу эшләре барышын да карады. Ул утрауның иң борынгы чиркәве санала. Ул ике катлы, бинага кушып 43 метрлы манара да төзелгән. Биредә яңарту эшләре тулы куәтенә бара.

"Мин чагыштырмача күптән Зөядә булмадым, тәртип урнаштырмадым. Җәйге иң озын көннәре бетү борчу тудыра. Мондый вакытта эшләмәү - православиедә дә, мөселманнарда да гөнаһ. Хәзер тәүлек әйләнәсендә эшләргә мөмкинлек биргән яхшы шартлар булдырылган. Күп кенә объектларда эшләр шулай бара да. Бүгенге сәфәр барышында күп мәсьәләләр каралды. Елга вокзалыннан башлап, без анда булган вакытта ярга Мәскәү, Кузбасс, Калининград туристлары чыкты. Алар таныша башлады, безне таныйлар, сораштыралар. Кешеләрне яхшырак итеп, ипи-тоз белән дә каршыларга да була бит. Без кешеләрне каршы ала беләбез ләбаса. Кешеләр ниндидер кызыклы әйберләр күрергә өметләнеп, балалары белән килә, республика белән танышырга телиләр, безгә карыйлар, безнең яхшы яшәгәнне күрәселәре килә. Без әйбәт яшибез, әмма туристлар да моны тоярга тиеш. Бездә сокланырлык кунакчыллык традицияләре бар һәм аларны күрсәтү зарур. Үзебездән беләбез бит, берәр җирдә булган вакытта аз гына игътибар да рәхәт. Без килгән кешеләрнең кәефләрен күтәрергә тиешбез", - дип ассызыклады Минтимер Шәймиев журналистларның сорауларына җавап биреп.