ТР Хөкүмәте йортында мәдәният өлкәсендә кадрлар әзерләү проблемасы турында фикер алыштылар

Татарстан Республикасы Премьер-министры Илдар Халиков бүген ТР Министрлар Кабинеты Президиумы утырышын уздырды, ул мәдәният өлкәсендә яшь белгечләр әзерләү темасына багышланган иде. Бу чара ТР Хөкүмәте йортында республиканың барлык муниципаль районнары белән видеоконференцэлемтә режимында узды.

Утырышта шулай ук ТР Премьер-министрының беренче урынбасары Алексей Песошин, ТР Премьер-министры урынбасары - ТР Министрлар Кабинеты аппараты җитәкчесе Шамил Гафаров , республика министрлыклары һәм ведомство вәкилләре, ТР мәдәният эшлеклеләре катнашты.

Илдар Халиков утырышны ачып, мәдәният өлкәсендә кадрлар әзерләү проблемасы турында узган очрашуда Рөстәм Миңнеханов белән фикер алышуларын искә төшерде.

Бүгенге көндә мәдәният өлкәсендә булачак белгечләрне стимуллаштыру механизмы кирәк, дип билгеләде Илдар Халиков. “Бу хакимият башлыклары һәм башкарма комитет җитәкчеләренең уртак эше. Әлеге мәсьәләне төрле яклап карарга кирәк. Без күпме кирәк, шуның кадәр клублар һәм Мәдәният йортлары төзи алабыз, ләкин квалификацияле белгечләрсез алар эшләмәячәк”,- диде ТР Премьер-министры.

Төп докладны ТР мәдәният министры Айрат Сибагатуллин ясады. Аның сүзләренчә, бу тармакта эшләүчеләр саны 2015 елның 1гыйнварына 20 мең 134 кеше тәшкил иткән, шул исәптән югары һөнәри белемле белгечләр-52%, урта һөнәри белемле белгечләр-31%.

Айрат Сибагатуллин билгеләгәнчә, 2014 ел нәтиҗәләре буенча мәдәният хезмәткәрләренең уртача хезмәт хакы 18 мең 585 сум тәшкил иткән.

Мәдәният һәм сәнгать өлкәсендә һөнәри белем бирү оешмаларын ТР бюджетыннан финанслау 2015 елда 319 млн. 730 мең сум күләмендә планлаштырылган, дип хәбәр итте министр.

Утырыш барышында шулай ук ТР Дәүләт Советының мәдәният, фән, мәгариф һәм милли мәсьәләләр буенча комитеты рәисе Разил Вәлиев, Н.Г.Җиһанов исемендәге Казан дәүләт консерваториясе ректоры Рубин Абдуллин, ТРның Нурлат муниципаль районы башлыгы Равил Кузюров, Казан дәүләт мәдәният һәм сәнгать университеты ректоры Ривкать Юсупов чыгыш ясады.