Рөстәм Миңнеханов Дублинда Google һәм Ding компанияләре офисларында булды

Бүген Татарстан Республикасы Президенты вазыйфаларын вакытлыча башкаручы Рөстәм Миңнеханов Дублинда (Ирландия) Google Европа штаб-квартирасында булды.

Рөстәм Миңнехановка һәм аны озата йөрүче Татарстан Республикасы делегациясе әгъзаларына Дублинның тарихи районында урнашкан күп катлы бина буйлап экскурсия оештырдылар. Компания офислары дизайнерлар тарафыннан бизәлгән функциональ пространстводан гыйбарәт, аларга белем алу үзәге, конференц-заллар, сөйләшүләр алып бару бүлмәләре, шулай ук рестораннар, микрокухнялар, күп сандагы коммуникацион блоклар һәм башкалар керә. Мондагы пространство эш өчен, шулай ук ял өчен дә кирәкле нәрсәләр белән җиһазландырылган.

Европада Google эшчәнлеге турында махсус тәкъдир итү барышында компания җитәкчелеге вәкилләре сөйләде. Компаниянең Ирландиядәге офисы 2003 елдан бирле эшләп килә. Google белегечләренең эше Ирландия Хөкүмәте өчен дә, шулай ук бизнес-бергәлекләр өчен дә кирәкле.

Рөстәм Миңнехановка шулай ук смартфоннар өчен Google гарнитурасының (Google Glass) ничек эшләвен күрсәттеләр.

Бүген Рөстәм Миңнеханов тагын Дублинда Ding компаниясендә булды. Ул – Ирландиянең иң инновацион һәм бик тиз үсүче технологик компаниясе.

Бу процессинг компания мобиль телефон хисабын Интернет челтәре аша тулыландыру хезмәтләре күрсәтә. Бүген Ding компаниясе белән бөтен дөнья буйлап 350 мобиль элемтә операторы хезмәттәшлек итә, барысы 130 ил. Россиядә Ding партнеры – Qiwi («Киви») компаниясе.