Илдар Халиков Спортның су төрләре буенча дөнья чемпионатында катнашучылар өчен туклану пунктларының әзерлеген тикшерде

Татарстан Республикасы Премьер-министры Илдар Халиков бүген Казанда узачак 2015 елгы Спортның су төрләре буенча дөнья чемпионатында катнашучылар өчен туклану пунктларының әзерлеген тикшерде. Аны ТР Премьер-министр урынбасары- ТР Министрлар Кабинеты аппараты җитәкчесе Шамил Гафаров, ТР яшьләр эшләре һәм спорт министры Владимир Леонов, “Спорт проектлары башкарма дирекциясе” коммерцияле булмаган автоном оешма генераль директоры Азат Кадыров озата йөрде.

Спортчылар өчен төп ресторан Идел буе дәүләт физик культура академиясе бинасында урнашкан. Спортчылар менюсына Европа -31%, рус һәм милли ашлар (татар)-20%, Азия-22% ашлары, хәләл ризыклар-9% кертелгән. Вегетариан ашлар һәр зонада тәкъдим ителәчәк.

Илдар Халиков ресторанны карау барышында милли колорит белән бизәлгән рус һәм татар ашлары зонасында булды. ТР Премьер-министры уңай бәя бирде һәм эчке җиһазларны эшләп бетерергә кушты.

Шулай ук Илдар Халиков башка бүлекләрдә дә булды, эшче персонал белән сөйләште һәм кайбер ризыкларны ашап карады.
“Өйрәнүләргә бик җитди карарга кирәк. “Ә без иртәгә яхшырак ясарбыз”, дигән принцип белән эшләү һәрвакыт начар тәмамлана. Килеп чыгарга мөмкин булган барлык вариантларны уйлап эшләп бетерергә кирәк”, - дип ассызыклады ул.

Ул шулай ук бөтен персонал инглиз телен белергә тиеш, дип өстәде. Моннан тыш, Илдар Халиков туклану пунктлары өчен җаваплы хезмәткәрләргә логистика мәсьәләсен җентекләп эшләп бетерүне йөкләде. “Кешегә барысы да аңлаешлы булырга тиеш: поднос һәм приборларны каян алырга, ресторан буенча ничек йөрергә икәнлеге”, - дип билгеләде ул.