Илдар Халиков “Татнефть Арена” га транспорт йөрешен тикшерү буенча ведомствоара өйрәнүләрдә катнашты

Бүген Татарстан Республикасы Премьер-министры Илдар Халиков “Татнефть Арена” спорт комплексына Казандагы 2015 елгы Спортның су төрләре буенча дөнья чемпионатының ачылыш һәм ябылу тантанасын уздыру вакытында транспорт йөрешен тикшерү буенча ведомствоара өйрәнүләрдә катнашты.
Шулай ук өйрәнүләрдә ТР Премьер-министры урынбасары – ТР Министрлар Кабинеты Аппараты җитәкчесе Шамил Гафаров, ТР юл хуҗалыгы һәм транспорт министры Ленар Сафин, Эчке эшләр министрлыгының ТР буенча ЮХИДИ идарәсе башлыгы урынбасары Рөстәм Ибраһимов, “Спорт проектлары башкарма дирекциясе” коммерцияле булмаган автоном оешма генераль директоры Азат Кадыров катнашты.

Өйрәнүләр барышында Чемпионатның ачылыш һәм ябылу тантанасын уздыру урынына ФИНА төркеме вәкилләрен һәм спортчыларны транспорт белән йөртү, шулай ук объект территориясендә автобусларның күчеш логистикасы үзләштерелде. Барлыгы 42 автобус катнашты.

Илдар Халиков өйрәнүләрне оештыручылар белән кунакларның чемпионатның ачылыш һәм ябылу тантанасына килү тәртибе, автобусларның тукталу схемасы, шулай ук машиналарның шәһәр буенча йөрү мәсьәләләре турында фикер алышты.

Кунакларны тантанадан соң кунакханәләргә озата башлаганда да аерым проблемалар килеп чыгарга мөмкин, дип өстәде Премьер-министр. Ул бу мәсьәләне җентекләп өйрәнергә кушты.

Транспорт белән проблемалар калган тамашачылар – казанлылар һәм башкала кунаклары белән дә булмаска тиеш, дип ассызыклады Илдар Халиков.
“Спортчылар һәм ФИНА төркеменнән тыш монда 4,5 мең гади тамашачылар булачак. Без кешеләрне автомобильләрен өйдә калдырырга чакырабыз икән, ул чакта алар тантанадан соң каршылыкларсыз өйләренә кайтып җитү өчен тиешле шартлар булдырырга кирәк”, - дип билгеләде Илдар Халиков.
Кабат өйрәнүләр 22 июльдә узачак.