Татарстанда 9нчы сыйныф укучыларының математика һәм рус теле буенча төп дәүләт имтиханыннан уртача билгесе түбәнәйгән

Быел Татарстанда 9нчы сыйныф укучыларының 8 фән буенча төп дәүләт имтиханы нәтиҗәләре, 2014 ел күрсәткечләре белән чагыштырганда, яхшырак. Аерым алганда, физика, химия, биология, информатика, немец теле, җәмгыять белеме һәм рус әдәбиятыннан уртача билге арткан.

Бу хакта бүген ТР Министрлар Кабинетында уздырылган брифингта ТР Премьер-министры урынбасары – ТР мәгариф һәм фән министры Энгель Фәттахов хәбәр итте.

Ул китергән саннарга караганда, быел математикадан уртача билге – 3,68. Былтыр әлеге сан югарырак булып, 3,80 тәшкил иткән. Укучыларның 2,19 проценты, ягъни 750 кеше, минималь бусаганы үтә алмаган. Былтыр андыйларның саны 10га кимрәк булган.

Рус теле буенча да уртача билге, узган ел белән чагыштырганда, түбәнәйгән: 4,3тән 4,04кә калган. 9нчы сыйныф укучыларының 1,15 проценты (394 чыгарылыш) әлеге имтиханнан канәгатьләндерерлек билге алмаган.

Шул ук вакытта дәүләт йомгаклау аттестациясендә катнашучыларның 1249ы (3,6 процент) рус теленнән имтихан биремнәрен 100 процент үтәп, иң югары балл алуга ирешкән.

Уртача билге тарихтан (3,90нан 3,47гә) һәм француз теленнән (4,11дән 4,09га) дә кимегән. Инглиз теле буенча уртача күрсәткечләр исә узган ел дәрәҗәсендә калып, 4,44не тәшкил иткән.

ТР мәгариф һәм фән министры сүзләренә караганда, быел төп дәүләт имтиханнары 133 пунктта үткәрелгән. Алар оффлайн режимда эшли торган видеокүзәтү системалары һәм мелаталлэзләгечләр белән беренче мәртәбә җиһазландырылган булган.

“Безнең максат – төп дәүләт имтиханнарын мөмкин кадәр объектив үткәрү. Киләчәктә һәр муниципаль берәмлектә, һәр белем бирү оешмасында бу эшне системалы рәвештә башкарырга ниятлибез” – дип билгеләп узды Энгель Фәттахов үзенең чыгышында.