ТР Министрлар Кабинеты һәм “ФСК ЕЭС” гаммәви акционерлык җәмгыяте арасында хезмәттәшлек турында килешү имзаланды

Бүген Казанда Татарстан Республикасы Министрлар Кабинеты һәм “Бердәм энергетик системаның федераль челтәр компаниясе” (“ФСК ЕЭС”) гаммәви акционерлык җәмгыяте арасында хезмәттәшлек турында килешү имзаланды.
Имзалау тантанасы ТР Хөкүмәте йортында узды.

Документка Татарстан Республикасы Премьер-министры Илдар Халиков һәм “ФСК ЕЭС” гаммәви АҖ идарәсе рәисе Андрей Муров имзаларын куйды.

Ике яктан да катнашучылар кулланучыларны өзлексез электр энергиясе белән тәэмин итү, “ФСК ЕЭС” һәм “Сетевая компания” АҖләренең электр челтәре хуҗалыклары объектларының ышанычлы һәм нәтиҗәле эшләү, электр челтәре хуҗалыклары объектларында куркынычсызлыкны арттыру, үзара хезмәттәшлек мәсьәләләре буенча консолидацияләнгән позицияне эшләү өчен эшче төркем булдыруга әзер булуларын белдерделәр.

Килешү кысаларында “ФСК ЕЭС” гаммәви АҖ һәм Казан дәүләт энергетика университеты арасында белгечләр әзерләү һәм укыту мәсьәләләре буенча хезмәттәшлек гамәлгә ашырылачак.

Очрашу барышында Илдар Халиков “ФСК ЕЭС” гаммәви АҖ вәкилләренә Татарстанга килүләре өчен рәхмәт белдерде.
Ул шулай ук Татарстан Республикасы һәм “ФСК ЕЭС” гаммәви АҖнең бергә эшләү буенча зур тәҗрибәсе бар, дип билгеләде. Аерым алганда, ул 2013 елгы җәйге Универсиадага төзелгән энергетик объектлар өчен рәхмәт белдерде.