Марат Әхмәтов: “Корылыктан килгән зыян быел якынча 20 миллиард сум тәшкил итәчәк”

Татарстанга корылык китергән зыянның күләме − 20 миллиард сум чамасы.
Бу хакта бүген ТР Министрлар Кабинетында узган брифингта ТР Премьер-министры урынбасары - ТР азык-төлек министры Марат Әхмәтов хәбәр итте. Югалтылган бөртекле культураларның бәясе генә дә 10 миллиард сум чамасы.

Узган ел Татарстанда 5 миллион тонна бөртек суктырылган булса, быел бу күрсәткеч 3,5 миллион тонна тирәсе була. Димәк, узган ел белән чагыштырганда, югалтулар күләме 1,5 миллион тонна дигән сүз. Бу — республикада чәчүлек мәйданнарының якынча 50 процентына һава торышының начар йогынты ясавы нәтиҗәсе.

Министр сүзләренчә, җитештерүчеләр күргән зыянны турыдан-туры компенсацияләү булмаячак. Чәчелгән җирләрнең 45 проценты иминиятләштерелгән булган, шуңа да килгән зыянның кайбер өлешен иминият компанияләре каплаячак. “Әмма иминият компанияләренә ышаныч зур түгел. Килгән зыянның күләмен кечкенә итеп күрсәтү өчен алар меңләгән сәбәп табарга әзер”, - дип белдерде Марат Әхмәтов.

Федераль бюджеттан 8,5 миллион сум күләмендә ярдәм күрсәтеләчәк. Әмма әлеге акчаларның бары 2,5 миллиард сумы гына аграр тармак хезмәткәрләренә турыдан-туры бирелә. Республика бюдетыннан бүленгән ярдәмнең күләме 7,5 миллиард сум тәшкил итәр дип көтелә. Гомуми ярдәм исә 6 миллиард сумнан артып китәчәк, дип вәгъдә бирде министр.

Аның сүзләренчә, районнарда бүген-иртәгә урып-җыю эшләренә тотыначаклар. Әлегә планлаштырылган территориянең 8 процентында эшләр тәмамланган һәм 300 мең тонна бөртекле ашлык суктырылган. Быел уртача уңыш гектарыннан 22,4 центнерны тәшкил итә, узган ел 21,7 центнер булган.

Быел Татарстанда 579 мең тонна печән, 2038 мең тонна сенаж һәм 5 мең тонна яфрак азык әзерләнгән.
Хәзерге вакытка республикада бер мал башына исәпләгәндә, якынча 14әр центнер азык берәмлеге әзерләнгән. Кайбыч, Мамадыш, Әгерҗе, Теләче, Сарман районнарында исә бу күрсәткеч 18 центнер берәмлеккә җиткерлегән.
Икенче чабымнан азык әзерләү дәвам итә. Марат Әхмәтов хәбәр иткәнчә, быел малларга азык җитәрлек булачак.

“Быел шикәр чөгендере уңышы рекордлы булачак”, - дип вәгъдә бирде ТР
Шуңа бәйле рәвештә, Татарстанның шикәр заводлары эшчәнлекләрен арттырган. Модернизация нәтиҗәсендә, Буа, Нурлат шикәр заводлары көн саен 8 мең тоннага кадәр чимал җитештерә алачак. Зәйдәге шикәр заводы исә көн саен 3 мең тоннага кадәр чимал җитештерүен дәвам иттерәчәк, дип ышандырды Марат Әхмәтов.

Шикәр чөгендерен якынча 2 айдан соң гына ала башласалар да, заводлар бу эшкә бүгеннән үк әзерләнүен министр чыгышында ассызыклады.

Марат Әхмәтов шулай ук быел Татарстан яшелчә, бәрәңге, бөртекле ашлык һәм башка игенчелек продукциясе белән тулысынча тәэмин ителәчәк, дип ышандырды.

“Бөртекле ашлыкны сатып алу бәяләре бу атна ахырында билгеләнәчәк”, - дип йомгаклады ТР авыл хуҗалыгы һәм азык-төлек министры.