Рөстәм Миңнеханов Бөгелмә районында урып-җыю эшләре барышын бәяләде
Бүген Татарстан Республикасы Президенты вазыйфаларын вакытлыча башкаручы Рөстәм Миңнеханов эш сәфәре белән ТР Бөгелмә муниципаль районына барды. Төп максаты - урып-җыю эшләре барышы белән танышу.
Таллы Бүләк авылы кырындагы Муса Җәлил исемендәге агрофирма кырларының берсендә Татарстан Президенты вазыйфаларын вакытлыча башкаручы механизаторлар, хуҗалыклар җитәкчеләре, инвесторлар һәм Бөгелмә муниципаль районы авыллары халкы белән очрашты.
Бөгелмә муниципаль районы башлыгы Линар Закиров Рөстәм Миңнехановка районның агросәнәгать комплексындагы вәзгыять турында хәбәр итте. Гомуми чәчү мәйданы - 60 мең гектардан артык, шул исәптән 42 мең гектардан артыгы - игенгә яраклы җир (7,7 мең га - уҗым).
Урып-җыю эшләрен оештыру һәм аларның барышы тиешенчә бәяләнде.
Рөстәм Миңнеханов аерым алганда билгеләгәнчә, бүгенге көндә төп бурыч - югалтуларсыз уңышны җыю. Ул шулай ук авыл башлыклары игътибарын кешеләр белән конкрет эш итүгә юнәлдерде.