Казанда Спортның су төрләре буенча “Мастерс” категориясендә дөнья чемпионаты ачылу тантанасы узды

Бүген Казанда Спортның су төрләре буенча FINAның XVI дөнья чемпионатының төп мәдәни мәйданчыгы булган ФИНА паркында су мундиаленың “Мастерс” категориясендәге өлешен ачу тантанасы узды. Чарада әлеге Халыкара йөзү федерациясе президенты Хулио Маглионе һәм ТР Премьер-министры Илдар Халиков катнашты.

Быел Дөнья чемпионатында 73 илдән 3 меңгә якын спортчы катнаша, алар 14 яшь категориясендә 5 спорт төрендә көч сынаша.

Парктагы төп сәхнәдә үзәк урынны Казан һәм су спорты төрләренә багышланган видеороликларны күрсәткән экран биләп торды. Сәхнә түрендә диаметры 6 метр булган өстәмә әйләнеп тора торган мәйданчык урнаштырылып, аның үзәгендә “Мастерс” ДЧ символы булган зур факел куелган иде. Бу күркәм күренешкә ике ваннадан атылган су фонтаннары, лазер һәм пиротехника шоулары тагын да ямь өстәде.

Тантананы Казанның танылган тележурналистлары Ксения Седунова һәм Тимур Ханбиков алып барды. Вәкилләре дөнья чемпионатында катнашучы илләрнең әләмнәре парады бик оригиналь номер белән үрелеп узды – акробатлар, биючеләр, спортчылар тырышлыгы белән ул онытылмас булды.

Алга таба сәхнәгә мәртәбәле кунаклар – Хулио Маглионе һәм Илдар Халиков күтәрелде.
“ФИНА чемпионаты тарихында тәүге мәртәбә “Мастерс” категориясендә Спортның су төрләре буенча Дөнья чемпионаты ФИНА чемпионаты белән бер вакытта уза. “Мастерс” турниры тәмамланган чемпионатның матур һәм мавыктыргыч дәвамы булыр дип уйлыйбыз. Казан – бөек мәдәниятләр һәм традицияләр шәһәре. Казанның оештыру комитеты, “Мастерс” категориясендә Спортның су төрләре буенча чемпионат яңа дәрәҗәдә үтсен өчен бөтен көчен куйды. “Мастерс” категориясендәге турнир ФИНАның мөһим кыйммәтләрен раслый – сәламәт тормыш рәвеше, гадел көрәш, милләткә һәм яшь категориясенә карамастан, дуслык. Барыгызга да зур рәхмәт! Казанда “Мастерс” чемпионатында иң изге теләкләремне юллыйм”, – дип мөрәҗәгать итте тантанада катнашучыларга доктор Маглионе.

Илдар Халиков сәламләү чыгышында: “Мин ихлас күңелдән шат һәм ФИНАга Спортның су төрләре буенча Дөнья чемпионатын гына түгел, ә "Мастерс" категориясендә дә турнирны уздыруда безгә ышаныч белдерүләре өчен рәхмәтемне җиткерәсем килә. 73 ил вәкиленең, спортчыларның, Олимпия уеннары чемпионнарының, дөнья чемпионатлары җиңүчеләренең бирегә кунакка килүләре безнең өчен бик сөенечле. Спортчыларның үзләре омтылган казанышларга ирешүен телим. Россиядә, Казанда булуыгыз күңелегезгә хуш килеп, иң яхшы хатирәләр калдырыр дип ышанам. Без шундый киңкүләм ярышлар уздыра алуыбыз белән горурланабыз. Рәхим итегез!” – диде.

Берничә видеороликтан һәм мавыктыргыч шоу-чыгышлардан соң, сәхнәгә Россиянең “Мастерс” йөзү федерациясе президенты Александр Данилов менде. “Россия беренче тапкыр Спортның су төрләре буенча дөнья чемпионатын кабул итә. “Мастерс” турнирының да төп чемпионат белән бер вакытта искиткеч матур шәһәрдә үткәрелүе әһәмияткә ия. Без барыбыз да - яңа традиция тууы шаһитләре. Моның өчен җитәкчелеккә һәм ФИНА гаиләсенә рәхмәт!” – дип белдерде А. Данилов һәм “Мастерс” хәрәкәте үсешенә керткән өлешләре өчен ФИНА президенты Хулио Маглионега һәм башкаручы директоры Корнель Маркулескуга мактау билгеләре тапшырды.

Ачылу тантанасын урамда пиротехника эффектларын кулланып, Казанның иң яхшы солистлары – халыкара конкурслар һәм бию коллективлары лауреатлары катнашында вокал-хореографик композициясе дәвам иттерде.
Тантана салют белән тәмамланды.