Болгарда II Халыкара кыр археология мәктәбе ачылды

Бүген Болгар дәүләт тарих-архитектура музей-саклаулыгында, Идел буе болгарларының 922 елда ислам динен кабул итү хөрмәтенә куелган Истәлек билгесе конференцияләр залында II Халыкара кыр археология мәктәбе ачылды.

Мәктәпне уздыруның максаты – Евразиянең археологик мирасын өйрәнү практикасына яңа алымнар кертү нигезендә фәнни эшләрне берләштерү.

Мәктәпне оештыручылар: ТР ФАнең А.Х.Халиков исемендәге Археология институты һәм Казан федераль университеты, аларга “Яңарыш” республика фонды һәм Болгар дәүләт тарих-архитектура музей-саклаулыгы оештыру һәм финанс ярдәме күрсәтә.

II Халыкара мәктәптә дөньяның 25 иленнән 100 яшь галим-тикшеренүче катнаша. Яшь археологлар ике атна эчендә мәктәпнең 7 секциясендә тарихи һәм мәдәни мирасны өйрәнүгә фәнара якын килүне үзләштерергә тиеш булалар: археологиядә архео-биология ысуллары, археологик пыяла, археологиядә геомәгълүмати системалар, борынгы керамика тарихы, борынгы заманнарда металлургия һәм металл эшкәртү тарихы, борынгы коралларны эксперименталь-трасологик өйрәнү һәм палеоантропология.

Мәктәптә Россия һәм чит илләрнең фәнни-тикшеренү үзәкләреннән 50 дән артык зур галим лекция укыячак.

Ачылыш тантанасында катнашучыларны ТР мәдәният министры урынбасары Светлана Персова сәламләде һәм бүгенге истәлекле көн белән котлады.

Мәктәпнең укытучылары составы исеменнән Россия ФАнең мөхбир-әгъзасы, М.В. Ломоносов исемендәге Мәскәү дәүләт университетының антропология музее һәм Фәнни-тикшеренү институты директоры Александра Бужилова чыгыш ясады. Ул мәктәпнең фәнни һәм оештыру дәрәҗәсенең югары булуын билгеләде һәм уңышлар теләде.

Кытайдан Тарихкача булган чорны өйрәнүче тарихчылар халыкара җәмгыяте вице-президенты Ямей Хоу үзенең чыгышында бөтендөнья фәнендә борынгы коралларны өйрәнү буенча Россия мәктәбенең өстенлегенә игътибар итте.
Тантана тәмамланганда Франциянең Милли саклау археология институты фәнни хезмәткәре Анаик Самзун, Франциядә саклау археологиясен оештыру темасы буенча доклад ясады.

II Халыкара кыр археология мәктәбе 2015 елның 17 августыннан 30 августына кадәр Болгар дәүләт тарих-архитектура музей-саклаулыгы территориясендә узачак. Мәктәпнең программасында “Евразия халыкларының мәдәни мирасын өйрәнү һәм саклау буенча актуаль проблемалар” темасына конференция, гомуми лекцияләр, методик дәресләр, түгәрәк өстәлләр каралган.

Мәктәптә катнашучылар шулай ук Болгар комплексындагы тарихи ядкәрләр белән танышачаклар, Болгар цивилизациясе музее, Икмәк музее, Ак мәчеттә булачаклар.