Татарстанда “Мәктәпкә җыенырга ярдәм ит” акциясе кысаларында беренче сыйныфка керүче 7,5 мең балага хәйрия ярдәме күрсәтелгән

Быел Татарстанда “Мәктәпкә җыенырга ярдәм ит” республика акциясе кысаларында беренче сыйныфка керүче ярдәмгә мохтаҗ 8,3 мең баланың 7,5 меңенә хәйрия ярдәме күрсәтелгән. Акция 1 сентябрьгә кадәр дәвам итәчәк.

Бу хакта бүген ТР Хөкүмәте йортында уздырылган брифингта ТР Президенты ярдәмчесе Ләйлә Фазлыева хәбәр итте.

Ул искәртеп узганча, республика хәйрия акциясе Татарстанда 2007 елдан бирле үткәрелә. “Шушы вакыт эчендә җәмгысе 160 млн сумлык хәйрия ярдәме күрсәтелгән”, – дип билгеләп узды Ләйлә Фазлыева. Аның сүзләренчә, бу акция кысаларында ярдәм, беренче сыйныфка керергә җыенучы сабыйлардан тыш, аз керемле, күп балалы гаиләләрдә тәрбияләнүче, инвалид ата-аналар белән яшәүче физик мөмкинлекләре чикле 2-11нче сыйныф укучыларына да күрсәтелә.

2007 елдан 2014 елга кадәр мәктәпкә керергә җыенучы 142 мең 310 балага һәм 2-11нче сыйныфларда белем алучы 50 мең 661 укучыга хәйрия ярдәме күрсәтелгән. Шул рәвешле, җәмгысе 193 меңгә якын укучы бала ярдәм алган.

Мәктәп букчасы комплекты составы традицион булып кала бирә: бу канцелярия товарлары, дәфтәрләр, хезмәт һәм рәсем сәнгате дәресләре өчен җыелма, мәктәп формасы комплектлары.

Ләйлә Фазлыева билгеләп узганча, акцияне тормышка ашыру барышында кызыклы фикерләр дә барлыкка килгән. Традицион технологияләр – җәмәгать транспортында акча җыю кублары урнаштыру, оешмалар тарафыннан бер көнлек хезмәт хакын күчерү, игелекле гамәлләр марафоннары, хәйрия аукционнары уздыру белән беррәттән, оригиналь ысуллар да файдаланыла. Әйтик, Мамадыш һәм Яңа Чишмә районнарында беренче сыйныфка баручы балаларның чәчләрен бушлай кисү оештырылган. Чүпрәле районының Иске Чүпрәле авылында “Акчарлак” бассейны күп балалы 4 гаиләгә 1 елга бассейнга йөрүгә абонемент бүләк иткән.
Лениногорск районында да спорт коплекслары, биюгә йөрүгә сертификатлар тапшырылган. Сарман районында исә 5 һәм аннан да күбрәк бала тәрбияләүче гаиләләргә мультиварка һәм велосипед өләшкәннәр.

Ләйлә Фазлыева сүзләренә караганда, быел Татарстан “Мәктәпкә җыенырга ярдәм ит” акциясе кысаларында үзләрен бәйсез дип игълан иткән Донецк һәм Луганск халык республикалары балаларына гуманитар ярдәм җыю буенча акциядә дә актив катнашкан.

“Бу акциядә мәктәп укучылары да, студентлар да, Татарстан Республикасы территориясендә эшли торган оешмалар һәм предприятиеләр коллективлары да актив булды. Канцелярия кирәк-яракларыннан тыш, мәктәп һәм спорт формалары да җибәрелде. Бу акциягә тотылган акчаның гомуми күләме 3 млн сумга якын”, – диде ТР Президенты ярдәмчесе.