“Татспиртпром” беренче ярты еллыкта сатуны 21%ка арттырган

Бүген Казанда “Татспиртпром” ААҖнең Директорлар советы утырышы узды, аның барышында 2015 елның беренче ярты елында компания эшчәнлегенең нәтиҗәләре каралды.

Директорлар советы утырышы барышында “Татспиртпром”ның беренче ярты еллыкта җитештерү һәм финанс эшчәнлеге нәтиҗәләре турында мәгълүматлар хәбәр ителде. Бу чорда 3,440 млн. декалитр алкоголь продукциясе җитештерелгән, җитештерү планы 183 мең декалитрга арткан.

Алкоголь продукциясен сатуның гомуми күләме 3,743 млн. декалитр тәшкил иткән, 2014 елның шул чорына караганда 21%ка арткан.

Татарстаннан читтә, РФ территориясендә, “Алкоторг” ҖЧҖ аша 694 мең декалитр алкоголь продукциясе сатылган, узган елның шул чорына караганда 32%ка күбрәк.

Компаниянең табышы сизелерлек арткан – 2015 елның беренче ярты елында 3,975 млрд. сумга җиткән, 2014 елның беренче ярты елында ул 2,505 млрд. сум тәшкил иткән.

2015 елның беренче ярты елында “Татспиртпром” ААҖ барлык дәрәҗәдәге бюджетка 8,908 млрд. сум салым һәм җыемнар күчергән, узган елның шул чорына караганда 107%ка арткан.

Татарстан Республикасының консолидацияләнгән бюджетына 2015 елның беренче ярты елында 3,025 млрд. сум кергән.

Илдар Халиков компания эшчәнлеге нәтиҗәләрен уңай бәяләде һәм үсешнең алга китешен билгеләде.