Татарстан Премьер-министры Әгерҗе районы халкын яңа мәктәп һәм күп функцияле үзәк ачылу белән котлады

Татарстан Республикасы Премьер-министры Илдар Халиков бүген ТРның Әгерҗе муниципаль районында яңа мәктәп һәм күп функцияле үзәк ачылышында катнашты.

Илдар Халиков Яморза авылы халкын күп функцияле үзәк ачылу белән котлады. Ул ассызыклаганча, соңгы 4 елда Татарстанда 184 шундый үзәк ачылган.
“Клуб авылда электән яшьләрнең очрашу урыны булган, монда танышканнар, бер-берсенә гашыйк булганнар. Сезнең үзәк тә авылдашларның, кунакларның аралашу урыны, яңа талантлар ачылу, ана теленә һәм китапка мәхәббәт тәрбияләү урыны булсын”, - диде ул.
Мәдәният йортыннан тыш, бу бинада спорт зал һәм китапханә бар.

Алга таба Илдар Халиков Татар Шаршадысы авылына юнәлде, анда ул яңа башлангыч мәктәп һәм 50 урынга балалар бакчасы ачылу тантанасында катнашты. Ике учреждение дә бер бинада урнашкан. Яңа уку елында балалар бакчасына 20 бала, ә мәктәпкә 14 бала йөриячәк.

Аннан соң Илдар Халиков һәм кунаклар яңа мәгариф учреждениеләре биналарын карадылар. ТР Хөкүмәте рәисе төзүчеләргә сыйфатлы эшләре өчен рәхмәт белдерде.