Татарстан Премьер-министры Илдар Халиков Түбән Камада яңа балалар бакчасы ачуда катнашты

Бүген Түбән Кама шәһәрендә “Сөенеч” исемле 94нче балалар бакчасы ачылды. Бу вакыйга белән яшь түбәнкамалыларны котларга РФ Президентының Идел буе федераль округындагы тулы вәкаләтле вәкиле урынбасары Алексей Сухов, ТР Премьер-министры Илдар Халиков, Түбән Кама муниципаль районы башлыгы Айдар Метшин килде.

Яңа мәктәпкәчә учреждение балалар бакчалары төзү буенча республика программасы кысаларында төзелгән.
“Ел саен президент программасы кысаларында без Татарстан территориясендә 50 дән артык яңа балалар бакчасы төзибез. Быел 75 төзелгән. Бу катлаулы, әмма мөһим бурыч, без аны гамәлгә ашырырга тиеш”, - диде Илдар Халиков, кунакларны сәламләп.

Яңа балалар бакчасы һәм белем көне белән кунакларны шулай ук Алексей Сухов котлады. Ул балаларның сәламәт һәм бәхетле булып үсүләре, яхшы шартларда тәрбияләнүләре мөһим, дип ассызыклады.

“260 тан артык бала бу яңа бакчага йөриячәк. Безнең шәһәребез, республикабыз үсә, балалар күп туа – бу бик яхшы, иртәгәге көнгә ышаныч бар. Мин чын күңелемнән бу матур бәйрәм белән котлыйм! Безнең балаларыбыз монда сәламәт һәм бәхетле булып үссеннәр”, - дип билгеләде Айдар Метшин.

“Сөенеч” балалар бакчасы коллективына ТР Хөкүмәтеннән 100 меңгә сертификат тапшырылды.