ТР Премьер-министры Балык Бистәсе районында яңа парк һәм район үзәк хастаханәсенең балалар поликлиникасында булды

Бүген ТР Премьер-министры Илдар Халиков, республикада Парклар һәм скверлар елы уңаеннан, Балык Бистәсе районында булды. Район башлыгы Илһам Вәлиев белән бергә Чулман ярындагы яңа паркта, "Сәламәт бул" клубы әгъзалары, районның үзешчән сәнгать коллективлары, җирле рәссамнар, шагыйрьләр, китап сөючеләр һәм спортчылар катнашында узган чараларда булды.

Рәсми тантана Чулман яры - Балык Бистәсе халкының яраткан ял итү урынында үтте. Чарада берничә йөз җирле кеше һәм кунаклар катнашты.
"Бүген безнең өчен бик шатлыклы көн. Без республика җитәкчеләренә парклар һәм скверларны төзекләндерүгә булышканнары өчен рәхмәтле. Республика программалары ярдәмендә район үзәкләре һәм торак пунктлар танымаслык булып үзгәрә", - диде район башлыгы Илһам Вәлиев тантаналы чарада.

"2015 ел ТРда парклар һәм скверлар елы дип игълан ителү сәбәпле, Балык Бистәсендә яшьләр, гаиләләр белән ял итү өчен заманча стильдә төзекләндерелгән урыннар булдырылды. Сез яр буен төзекләндерүгә бик иҗади якын килгәнсез", - дип билгеләп үтте Премьер-министр.

Үз сәфәре барышында Илдар Халиков район үзәк хастаханәсенең төзекләндерүдән соң ачылган балалар хастаханәсендә дә булды. Соңгысында реконструкцияләү белән танышканнан соң, ул табиблар белән аралашты, җиһазландыру турында кызыксынды. Әйтергә кирәк, хастаханәне төзекләндерүгә һәм җиһазландыруга республика бюджетыннан 5 миллион сумга якын акча күчерелгән. Дәвалау учреждениесе вәкилләре республика җитәкчелеге адресына рәхмәт сүзләрен җиткерде, дип хәбәр итә районның "Авыл офыклары" газетасы.