Алексей Песошин социаль-хезмәт мөнәсәбәтләрен көйләү буенча республика өч яклы комиссия утырышын уздырды

Татарстан Республикасы Хөкүмәте йортында бүген социаль-хезмәт мөнәсәбәтләрен көйләү буенча республика өч яклы комиссия утырышы узды.
Утырышны Татарстан Республикасы Премьер-министры вазыйфаларын башкаручы, республика өч яклы комиссиянең координаторы Алексей Песошин уздырды.

Алексей Песошин хәбәр иткәнчә, утырышка комиссия әгъзалары, дәүләт хакимиятенең башкарма органнары, ТР Профсоюзлар федерациясе, эш бирүчеләр берләшмәсе вәкилләре, зур предприятиеләрнең профсоюз комитетлары рәисләре, “Россия югары социаль нәтиҗәлелек оешмасы” Бөтенроссия конкурсының республика этабында приз алучылар һәм җиңүчеләр оешмалары җитәкчеләре чакырылган.

Комиссия әгъзалары Татарстан Республикасында минималь хезмәт хакы турында Татарстан Республикасы Профсоюзлар федерациясе, Татарстан Республикасы Эш бирүчеләр берләшмәләренең координацион советы һәм Татарстан Республикасы Министрлар Кабинеты арасында Килешү проектын карады.

ТР Профсоюзлар федерациясе рәисе Татьяна Водопьянова хәбәр иткәнчә, Килешү проекты нигезендә республикада минималь хезмәт хакын 7 309 сумнан ким булмаган күләмдә билгеләү тәкъдим ителә (бу ТРда билгеләнгән яшәү минимумының 80%ы ). 2018 елда аның күләмен 100%ка җиткерү ниятләнә.

Татьяна Водопьянова комиссия әгъзаларыннан, Килешү 2015 елның ноябрендә үз көченә керсен өчен, аны имзалау срогын билгеләүне сорады.

Утырыш кысаларында 2014 елгы “Россия югары социаль нәтиҗәлелек оешмасы” Бөтенроссия конкурсының республика этабында приз алучыларын һәм җиңүчеләрен бүләкләү булды. Конкурс республикада 2010 елдан уздырыла һәм ул предприятие һәм оешмаларның иң яхшы социаль проектларын ачыкларга мөмкинлек бирә.