Рөстәм Миңнехановка, урып-җыю кампаниясе тәмамлану билгесе буларак, түгәрәк икмәк бүләк иттеләр
Бүген Татарстан Республикасы Президенты вазыйфаларын вакытлыча башкаручы Рөстәм Миңнехановка, урып-җыю кампаниясе тәмамлану билгесе буларак, түгәрәк икмәк бүләк иттеләр.
Татарстан Республикасы Хөкүмәте Йортында Рөстәм Миңнехановка түгәрәк икмәкне Әтнә муниципаль районы башлыгы Габделәхәт Хәкимов тапшырды.
Чарада Татарстан Республикасы Премьер-министры урынбасары-Татарстан Республикасы авыл хуҗалыгы һәм азык-төлек министры Марат Әхмәтов катнашты.
Рөстәм Миңнеханов авыл хуҗалыгы хезмәтчәннәренә республика басуларындагы хезмәтләре һәм бөртеклеләрне урып-җыюны уңышлы тәмамлаганнары өчен рәхмәт белдерде.
Искәртәбез, бүген урып-җыю кампаниясе Татарстан Республикасының күп районнарында төгәлләнгән. 2015 елның 10 сентябренә мәгълүм күрсәткечләр буенча 1,5 млн. гектар иген җыеп алынган. 3,2 млн. тонна ашлык суктырылган. Уртача уңыш 21,4 ц/га тәшкил итә.
Бөртеклеләрне Әтнә, Апас, Зәй районнары җыеп алган инде. Кайбыч, Әлки, Нурлат районнарында урып-җыю якын көннәрдә тәмамланачак.