Казанда Татарстан - Словения эшлекле форумы узды

Бүген Казанда Россия - Словения сәүдә-икътисади һәм фәнни-техник хезмәттәшлек буенча Хөкүмәтара комиссиянең XII утырышы кысаларында Татарстан - Словения эшлекле форумы узды.
Утырышта катнашучыларны Хөкүмәтара комиссиясенең Россия вәкиле - РФ элемтә һәм массакүләм коммуникацияләр министры Николай Никифоров, Словения Республикасы Хөкүмәте рәисе урынбасары, тышкы эшләр министры Карл Эрьявец һәм ТР Премьер-министры Илдар Халиков сәламләде. Эшлекле форум башланганчы, кунаклар Татарстан куәте-мөмкинлекләре чагылдырылган күргәзмә экспозициясе белән кызыксынып танышты.

Николай Никифоров үзенең чыгышында белдергәнчә, Словения Европа берлеге (ЕС) илләре арасында Россиянең иң перспективалы партнерларының берсе санала. "Соңгы елларда ике яклы сәүдә-икътисадый мөнәсәбәтләрнең рекордлы күләмен теркәдек, - диде Россия министры һәм 2013 елда илләр арасындагы товар әйләнеше 2 млрд АКШ доллары тәшкил итүен искәртте. Шул ук вакытта ул 2014 елда бу күрсәткечнең төшүен аерым билгеләп үтте. - Бу очракта дөнья валютасының курсы үзгәрү, углеводород бәяләре төшү кебек объектив сәбәпләр дә бар, шулай ук санкцияләр йогынтысы да. Словения Республикасы белән төбәк дәрәҗәсендә элемтәләр мөһим дип саныйбыз. Кече һәм урта бизнес арасында мөнәсәбәтләр булдыру буенча эшләрне көчәйтергә, инвестицияләр һәм хезмәттәшлек өчен яңа юнәлешләр эзләргә кирәк саныйм", - диде Н.Никифоров.

Министр сүзләренчә, Словениянең эшлекле даирәләре Россия төбәкләре белән хезмәттәшлекне үстерү буенча кызыксыну белдерә. "Бүгенге очрашу безгә кызыклы яңа проектлар чынга ашырырга ярдәм итәр дип өметләнәм. Сүз дә юк, Россия белән Словения бизнесменнары бер-берсе белән эшләргә тели. Безнең илләрнең эшлекле элемтәләре сәяси мөнәсәбәтләр өчен ныклы нигез булырга тиеш", - дип ассызыклады Н.Никифоров.

Карл Эрьявец Татарстанда җылы-дустанә кабул итүләре һәм Россиянең үсеш алган төбәкләренең берсенең бай хуҗалык потенциалы белән танышу мөмкинлеге өчен рәхмәт белдерде. Ул Россия белән Словения хезмәттәшлеген дустанә буларак бәяләде, чөнки илләр сәяси диалогның югары дәрәҗәсен саклый. Ул күптән түгел Словениядә РФ Хөкүмәте Рәисе Дмитрий Медведев булуын, аның шушы сәфәре дәвамында төрле өлкәләрдә хезмәттәшлек өчен яхшы база булдырган 4 хокукый акт имзалануын искәртте. "Дәүләтләр арасында хезмәттәшлекне ныгытуны автомобиль индустриясе, авыл хуҗалыгы, туризм һшм инвестицияләр өлкәсендә билгеләп үтәргә кирәк, шуңа күрә Россия партнерларын Словениядә икътисадый һәм хосусыйлаштыру проектларында катнашырга чакырырга телим. Узган ел һәм быел Россия инвестицияләре үсеше туризм өлкәсендә билгеләп үтелде, - диде тышкы эшләр министры. - Словениянең эшлекле даирәсе Россия базарын бик перспективалы буларак бәяли. Словениянең күп санлы предприятиеләренең биредә вәкиллекләре бар яки ачарга телиләр. Алар Татарстанда да бар. Бүген Словения предприятиеләре белән Россия партнерлары арасында ике килешү имзаланды", - дип искәртте ул.

К.Эрьявец чыгышын тәмамлап, бүгенге Хөкүмәтара комиссия Словения һәм Россия предприятиеләре белән икътисади элемтәләрне ныгыту мөмкинлеге бирәчәк, дип белдерде. "Словения Хөкүмәте, Европа берлеге чикләүләренә карамастан, дуслыкны сакларга, хезмәттәшлекне үстерергә омтыла", - диде.

Словения Республикасы тышкы эшләр министры чыгышындагы фикерләрне Илдар Халиков хуплады һәм Хөкүмәтара утырыш кысаларында Татарстанның төрле өлкәләрдәге элемтәләрне ныгыту һәм яңаларын булдыру мөмкинлеге булуын билгеләп үтте. "Мондый мөмкинлекләр бездә бик күп. Мәгълүмати технологияләр, машина төзелеше, фән һәм мәгариф системасы, авыл хуҗалыгы өлкәләрендә хезмәттәшлек үстерергә мөмкин. Россиягә карата Европа берлеге илләре ягыннан булган чикләүләр вакытлыча гына, алар безнең элемтәләр һәм проектлар өчен каршылык булырга тиеш түгел дип саныйм ", - диде ТР Премьер-министры.