Илдар Халиков Кувейт делегациясе вәкилләре белән очрашты

Татарстан Премьер-министры вазифаларын башкаручы Илдар Халиков бүген ТР Хөкүмәте йортында Кувейт дәүләте вәкилләре белән очрашты. Очрашуда шулай ук ТР сәнәгать һәм сәүдә министрының беренче урынбасары вазифаларын башкаручы Руслан Кәбиров, ТР Премьер-министры ярдәмчесе вазифаларын башкаручы Назил Насыйбуллин, ТР Инвестицион үсеш агентлыгы җитәкчесе вазифаларын башкаручы Талия Миңнуллина катнашты.

Илдар Халиков ассызыклаганча, Татарстан белән Кувейт арасындагы партнерлык мөнәсәбәтләре 2008 елдан актив үсештә. Шуңа карамастан, тышкы сәүдә әйләнешенең гомуми күләме 2015 елның беренче ярты елы нәтиҗәләре буенча 64,2 мең АКШ доллары тәшкил итә. Бу визит ике республика арасында уңышлы һәм озак вакытлы хезмәттәшлек өчен яңа этәргеч булырга тиеш. Илдар Халиков чит ил делегациясе әгъзаларына ТР белән сәүдә-икътисади һәм инвестицион хезмәттәшлекне үстерергә омтылулары өчен рәхмәт белдерде.

Алга таба Илдар Халиков кунакларга республиканың сәнәгать һәм инвестицион потенциалы, шул исәптән Иннополис шәһәре төзелеше проекты турында сөйләде.

Ике яктан да катнашучылар Татарстан һәм Кувейт арасындагы хезмәттәшлекнең иң перспективалы юнәлешләре хакында фикер алыштылар: кунакханә бизнесы, авиация, машина төзелеше, нефть-газ чыгару җиһазлары белән тәэмин итү.

Очрашу тәмамланганда Илдар Халиков кунакларны якынлашып килүче Корбан бәйрәме белән котлады. “Бу бәйрәм безгә көч һәм дәрт өстәсен, һәрбер йортка, һәрбер гаиләгә шатлык һәм ышаныч китереп, безне изге эшләргә юнәлтсен иде!”, - дип теләде ул.