Минтимер Шәймиев өченче чакырылыш Казан шәһәре Думасының беренче сессиясендә катнашты

Бүген Казан ратушасында өченче чакырылыш Казан шәһәре Думасының беренче сессиясе узды. Анда шулай ук Татарстан Республикасы Дәүләт Киңәшчесе Минтимер Шәймиев катнашты.

Киңәшмә башланганда Казанның сайлау комиссиясе рәисе Фәрит Гәрәев 13 сентябрьдә уздырылган муниципаль сайлауларга йомгак ясады. Казан шәһәре Думасы тулы составта 50 депутаттан формалашты.

Барлыгы өченче чакырылыш Казан шәһәре Думасында “Бердәм Россия”дән 43 депутат, КПРФтан 3 депутат һәм “Гадел Россия”дән (“Справедливая Россия”) 3 депутат тәкъдим ителде.

Алга таба депутатлар Казан шәһәре муниципаль берәмлеге башлыгы турындагы мәсьәләне карарга керештеләр.
Казан мэры постына өч кандидат күрсәтелгән иде. “Бердәм Россия” фракциясе шәһәр мэры Илсур Метшинны, “Гадел Россия” - фракция җитәкчесе Рушания Бильгильдиеваны, КПРФ - фракция җитәкчесе Алексей Серовны күрсәтте.

Кандидатлар чыгышыннан соң Минтимер Шәймиев сүз алды. Ул 2006-2015 елларда Илсур Метшин командасы җитәкчелегендә Казан ирешкән уңышларны билгеләде.
"Сез безнең башкаланы Россиянең иң яхшы шәһәре дәрәҗәсенә, дөнья шәһәрләре арасында көндәшлеккә сәләтлелек дәрәҗәсенә чыгардыгыз. Без сезне монда эшләр өчен сайларга тиеш. Мин башка кандидатларны да тыңладым, алар сезнең яхшы ярдәмчеләрегез булыр”,- диде ул Илсур Метшинга мөрәҗәгать итеп. Аның сүзләренчә, үзгәрешләр бик зур, ул тузган торакны бетерү, торак төзелеше, демографиядә уңай күрсәткечләр, торакны һәм социаль объектларны капиталь төзекләндерү һәм башка уңышлар турында сөйләде.

Яшерен тавыш бирү юлы белән Казан мэры вазифаларына Илсур Метшин сайлануы билгеле булгач, Минтимер Шәймиев тагын чыгыш ясады. Илсур Метшинга теләкләрен теләп,"Сезнең мөмкинлекләрегез зур, сез бик күпне эшли аласыз. Сез чираттагы срокка үзегезгә зур җаваплылык алдыгыз. Татарстанлылар киләчәктә дә уңышлар көтә", - диде.

Минтимер Шәймиев республикада 2030 нчы елга кадәр социаль-икътисади үсешнең төп күрсәткечләре билгеләнгәнен аерым белдерде. Ул хәбәр иткәнчә, шушы көннәрдә Татарстан Президенты һәм республика җитәкчелеге Татарстан Республикасы оешуның 100 еллыгын билгеләп үтү буенча программа билгеләргә тиеш. "Без республикабызның 100 еллыгын лаеклы каршы алырга тиешбез”, - дип белдерде ул.

“Эшләргә без өйрәндек, ләкин алда безне яңа югарырак үрләр көтә, аларны яулау шулай ук безнең көчебездән килә", - дип өстәде Минтимер Шәймиев.