Илдар Халиков: Чаллы шәһәре үзен бик оешкан һәм көчле организм буларак күрсәтте

Бүген Чаллыда Шәһәр советының яңа сайланган депутатларының беренче утырышы узды. Анда Татарстан Республикасы Премьер-министры вазифаларын башкаручы Илдар Халиков, Дәүләт Советы депутатлары катнашты.

Утырышның көн үзәгендәге төп мәсьәлә - Чаллы шәһәре мэрын сайлау булды. Мэр вазифасына КПРФтан Николай Атласов, "Бердәм Россия"дән Наил Мәһдиев кандидатуралары тәкъдим ителде.

Наил Мәһдиев кандидатурасын тәкъдим итү өчен Илдар Халиков депутатлар алдында чыгыш ясады. " ТР Президенты исеменнән, һәм үзем ТР Премьер-министры вазифаларын башкаручы буларак, сезгә Наил Мәһдиев кандидатурасын тәкъдим итәм. Наил Мәһдиевне 20 елдан артык беләм. Чаллыда эшләгән кыска гына вакыт эчендә дә аны “Чаллы бронепоезды” дип атарга мөмкин. Ул үзенә дә, коллективка да бик таләпчән кеше. ", - диде Илдар Халиков.

Соңрак яшерен тавыш бирү өчен тәнәфес игълан ителде. Сайлауда 43 депутат катнашты. Наил Мәһдиев кандидатурасы өчен 41 депутат тавыш биргән. Николай Атласов өчен 2 депутат тавыш биргән.

Сайлау нәтиҗәләре билгеле булгач Наил Мәһдиев рәсми рәвештә Чаллы шәһәре мэры вазифаларына кереште. “Шәһәр җитәкчесе буларак, мин социаль-мәдәни өлкә - мәгариф, сәламәтлек саклау, торак-коммуналь хуҗалык, спорт, архитектура мәсьәләләре белән шөгыльләнәчәкмен. Шулай ук милләтара мәсьәләләргә игътибар бирәчәкмен. Халыклар дуслыгы - Чаллының байлыгы” – диде ул.

Шулай ук бүген Наил Мәһдиев Чаллы мэры урынбасары итеп Флера Андрееваны тәкъдим итте. Аның кандидатурасы өчен күпчелек депутатлар тавыш бирде.