Илдар Халиков ТР Экология министрлыгы коллективына яңа җитәкчене тәкъдим итте

Татарстан Премьер-министры Илдар Халиков бүген ТР Экология һәм табигый байлыклар министрлыгына яңа җитәкчене тәкъдим итте.

Искә төшерәбез, бүген V чакырылыш Татарстан Дәүләт Советының унынчы утырышы барышында ТР Президенты Рөстәм Миңнеханов Татарстан Хөкүмәтенең яңа составын раслады.

Илдар Халиков ТР Экология һәм табигый байлыклар министрлыгы коллективына, шул исәптән элеккеге җитәкчесе Артем Сидоровка, рәхмәт белдерде. Озак еллар эшләү дәвамында Татарстан экологлары зур нәтиҗәләргә ирешә алды, - дип ассызыклады ТР Премьер-министры. “Сезнең команда күпләр хәл итеп булмаслык дип санаган проблемаларны чиште. Мәсәлән, "Нәфис-Косметикс" предприятиесенең атмосфера һавасын пычратуын бетерде. Моннан тыш, проблемалы "Түбәнкаманефтехим" белән тыгыз хезмәттәшлек булдырылган, "Татнефть" ААҖ дә бик күп эш башкарылган. Зур рәхмәт сезгә", - диде ул.

Илдар Халиков ассызыклаганча, яңа җитәкче алдына куелган төп бурыч - федераль үзәк белән эшне активлаштыру һәм халыкның игътибарын әйләнә-тирә мохитнең экологиясенә юнәлтү.

ТР Премьер-министры Фәрит Абдулганиевка һәм аның яңа коллективына куелган бурычларны гамәлгә ашыруда уңышлар теләде.

Яңа ТР экология һәм табигый байлыклар министры үз чиратында Татарстан Республикасы җитәкчелегенә ышанычлары өчен рәхмәт белдерде.

Алга таба Илдар Халиков Фәрит Абдулганиевка символик "министр портфеле”н тапшырды.

Белешмә өчен:
Фәрит Солтан улы Абдулганив
1976 елның 13 мартында туган.
1998 елда Казан дәүләт финанс-икътисад институтын тәмамлый. Доцент, икътисад фәннәре кандидаты.
2009 елдан “Казан 2013” башкарма дирекциясе” коммерцияле булмаган автоном оешма генераль директоры урынбасары.
2015 елның сентябреннән - ТР экология һәм табигый байлыклар министры.