Минтимер Шәймиев РФ ФҖ Федерация советы карарын шәрехләде

Бүген ТР Дәүләт Киңәшчесе Минтимер Шәймиев “Россия 1” һәм “Россия 24” телеканалларына РФ Федераль Җыены Федерация советының Суриядә РФ Хәрби көчләрен файдалануга рөхсәт бирүе турындагы карарын шәрехләде.

“Россия Президенты Владимир Владимирович Путин һәрвакыт дөньяның әйдәп баручы державаларын террорчылык таралышына каршы көрәштә берләшергә чакырды. Бу Берләшкән Милләтләр Оешмасы трибунасыннан чыгыш ясаганда ачык яңгырады. Минемчә, АКШ Президенты һәм кайбер дәүләт җитәкчеләре белән булган очрашуларда, ул аларны акыллы чаралар файдалануны кичектерергә ярамавына ышандыра алды. Һәм чыннан да, без Суриядә гади халыкның һәлак булуын, Бөтендөнья мирасы булган ядкәрләрнең җимерелүен, бу илдәге сугыш белән бәйле булган күп начарлыкны күзәтәбез. Иң мөһиме - боевиклар үзләренең җәзасыз калачакларын белеп, көчлеләнә баралар. Минем уйлавымча, дөньяның әйдәп баручы дәүләт җитәкчеләре тарафыннан аңлашу табу, бераз соңарган булса да, бу дөрес хәрәкәткә беренче адым. Шул сәбәпле Федерация Советының илебез Хәрби көчләрен аннан читтә файдалануга рөхсәт бирүче карары үзен аклый. Чөнки безнең ил өчен дә, Суриядән заманча корал файдалану мөмкинлеге ераклыгында булган башка дәүләтләр өчен дә, куркыныч туды. Дөнья буйлап террорчылык таралмасын өчен, кыю һәм бердәм эш итү кирәк. Әгәр дә без көчләрне берләштерә алмасак, бөтен дөньяны озакка сузылган күңелсез хәлләр көтә. Бердәм көч һәм сәяси ихтыяр көче кирәк.
Мондый карарлар җиңел бирелми. Карар кабул ителгән, шуңа әйдәп баручы илләрнең җитәкчеләре Сүриядәге вазгыять буенча якынаю юлында булганда аны хупларга кирәк”, - диде ул.