Минтимер Шәймиев Иван Белеков белән очрашты

Бүген Казан Кремлендә ТР Дәүләт Киңәшчесе, "Яңарыш" фондының Попечительләр советы рәисе Минтимер Шәймиев Алтай Республикасы Дәүләт җыены - Әл Корылтай рәисе Иван Белеков һәм республиканың Язучылар берлеге рәисе Бронтой Бедюров белән очрашты. Алтай кунаклары Казанга бүген ачылган XI Халыкара төрки халыклар шигърияте фестивалендә катнашу өчен килде.

Очрашуда шулай ук ТР Дәүләт Советының мәгариф, мәдәният, фән һәм милли мәсьәләләр комитеты рәисе, шагыйрь Разил Вәлиев катнашты.

Минтимер Шәймиев билгеләгәнчә, Алтай - бөтен төрки халыкларның ватаны, нәкъ шунда 552 елда борынгы төркиләр үзләренең беренче дәүләте - каганатны төзегән. Үзенең өч ел элек Алтайда булуын искә алып, ул Алтайның уникаль табигате безнең ил өчен генә түгел, ә бәлки бөтен дөнья өчен кыйммәтле байлык булуын ассызыклады.

Алтай Республикасы парламенты башлыгы Минтимер Шәймиевкә республикага даими ярдәме өчен рәхмәт белдерде.
2016 елда Алтай Республикасы истәлекле дата - алтайлыларның Россия составына керүенә 260 ел тулуны билгеләп үтәчәге турында хәбәр итте ул һәм Минтимер Шәймиевне шушы бәйрәмгә чакырды.

Очрашу барышында республикалар арасында мәдәният һәм мәгариф өлкәсендә мөмкин булган хезмәттәшлек юнәлешләре турында да фикер алыштылар.
Минтимер Шәймиев кунакларга "Мәдәни мирас: борынгы Болгар шәһәре һәм Зөя утрау-шәһәрлеге" мәдәни-тарихи проекты һәм "Яңарыш" фондының эшчәнлеге турында сөйләде.

Иван Белеков һәм Бронтой Бедюров хәбәр иткәнчә, иртәгә һәм берсекөнгә алар Болгар һәм Зөягә барачаклар.
Шулай ук алар Казан Кремлендә, ТР Милли китапанәсендә булачак һәм Г.Камал исемендәге Татар дәүләт академия театрында "Зәңгәр шәл" спектаклен караячак.