Татарстанда 25 меңнән артык укучы математика буенча БДИ бирәчәк

Быел Татарстан мәктәпләрен 25 меңнән артык 11 сыйныф укучысы тәмамлый һәм барысы да рус теле, матемика фәннәре буенча имтихан бирергә тиеш. Бу хакта бүген Татарстан Министрлар Кабинетында узган брифингта ТР мәгариф һәм фән министрының урынбасары Людмила Ногманова белдерде.

Министрның урынбасары узган ел республика территориясендә 32 меңгә якын кеше имтихан тапшырды, шул исәптә гомуми белем бирү учреждениеләрендә укучы 27220 бала, дип искә төшереп үтте. Быел ТР мәктәпләрен 25 меңнән артык 11 сыйныф укучысы тәмамлый.

Людмила Ногъманова билгеләп үткәнчә, быел Татарстанда 14 фән буенча Бердәм дәүләт имтиханы үткәреләчәк. Рус теле һәм математика буенча БДИ бирү мәҗбүри булачак, шулай ук әдәбият, мәгълүмати коммуникацион технологияләр, физика, химия, биология, география, история, җәмгыять белеме, информатика, чит телләр (инглиз, алман, француз һәм испан). БДИ формасында имтиханнар саны чыгарылыш укучылары тарафыннан нинди уку йортына керергә теләвен исәпкә алып билгеләнә.

Министрың урынбасары сүзләренчә, апрель-июньдә БДИ бирүчеләр чыгарылыш сыйныф укучылары һәм вуз, ссузларга укырга керүчеләр бердәм дәүләт имтиханында катнашуга заявкаларын 1нче мартка кадәр бирергә тиеш иде. 9нчы мартка булган мәгълүматлар буенча Татарстанда рус теле буенча 25344 кеше имтихан бирергә ниятли, ә математика буенча – 25043. Үзләре сайлап бирә торган фәннәр исемлеге ай ахырына кадәр ачыкланып бетәчәк.

ТР мәгариф һәм фән министрының урынбасары мәгълүматлары буенча 2010 елда БДИ бирүнең якынча вакыты билгеләнгән. Рус теленнән вакытыннан алда 20-30нчы апрельдә БДИ бирәчәкләр. БДИн вакытыннан алдан бирергә кичке мәктәпләрдә укучылар, армиягә чакырылучылар, халыкара һәм Россия ярышларында һәм конкурсларында катнашырга китүчеләр, чит илгә яшәргә китүчеләр һ.б. хокуклы. Людмила Ногманова белдерүенчә, БДИн вакытыннан алдан бирергә әлегә ике татарстанлы гына теләк белдергән.

Бердәм дәүләт имтиханнары тапшыруның төп этабы 27нче майдан башлап 21нче июньгә туры килә. 27нче майда – мәгълүмати коммуникацион технологияләр, биология һәм әдәбият, 31нче майда – рус теле, 4нче июньдә – чит телләр һәм химия, 7нче июньдә – математика, 11нче июньдә – тарих һәм физика, 15нче июньдә – җәмгыять белеме һәм география. Шулай ук 17-21нче июньгә резерв көннәр билгеләнгән. БДИның өстәмә этабы 8-19нчы июльгә туры килә.

10нчы майга кадәр барлык чыгарылыш укучыларына белем алу учреждениеләрендә яки теркәлү урыннарында БДИга пропуск алырга кирәк. БДИ буенча сорауларны ТР Мәгариф һәм фән министрлыгының кайнар линия телефоннарына мөрәҗәгать итәргә мөмкин: (843) 292-24-32 һәм 525-48-39 . Шулай ук министрлыкның БДИ бүлегендә еш бирелә торган сорауларга җавап табарга мөмкин.