Татарстан Хөкүмәте башлыгы Рөстәм Миңнеханов Яр Чаллы шәһәр Советының 46нчы сессия эшендә катнашты

Яр Чаллы шәһәренә без аеруча зур игътибар бирәбез. Ул республикабызның сәнәгать үзәкләренең берсе. Ул хакта бүген Татарстан Республикасы Премьер-министры Рөстәм Миңнеханов Яр Чаллы муниципаль берәмлеге шәһәр Советының 46нчы сессиясендә белдерде.

ТР Хөкүмәте башлыгы сүзләренчә, Автошәһәр финанс кризисыннан аеруча зур зыян күрде.

“Яр Чаллыда вәзгыять бигрәк тә катлаулы”, – диде ул.

“2010 ел җиңел булыр дип уйламыйм, - дип дәвам итте Рөстәм Миңнеханов. – Татарстан икътисады ел саен кимендә 6,5-7%ка үсә килде, хәтта 11%лык күрсәткечләргә дә ирешкәнебез бар. 2009 елда исә күрсәткечләребез шактый түбән булды. Без керемнәребезгә бәйле, ләкин узган елны республиканың консолидацияләнгән бюджеты 23 млрд. сумга әзрәк акча алды”.

ТР Премьер-министры Россия финанслар министрлыгы Татарстанга җитди ярдәм күрсәткәнен билгеләп үтте. Ул бюджет кредитын бирде. 2010 елга республика бюджеттагы 12 млрд. сумлык дефицит белән аяк басты. Соңгы ике айда күзәтелгән вәзгыять хәлләр кинәт кенә яхшырып китәр дигән өмет бирми.

Рөстәм Миңнеханов шулай ук республикада кайбер инвестицион программаларның туктатылганын искә төшерде. Шул ук вакытта Яр Чаллыдагы ашыгыч медицина ярдәме Хастаханәсен төзекләндерү программасын саклап калдылар. Ул төп программаларның берсе булып кала бирә.

ТР Премьер-министры күптән түгел Яр Чаллыдагы ашыгыч медицина ярдәме Хастаханәсенә югары технологияле медицина җиһазларын кайтару турындагы кредит килешүенә кул куелганын искә төшерде. (Тулырак итеп биредә укый аласыз - http://prav.tatar.ru/tat/index.htm/news/48253.htm).

“Ноябрьдә Хастаханәне төзекләндерү һәм җиһазларны кайтару эшләре тәмамланыр, дип уйлыйм”, - дип хәбәр итте ул.

Бүген бөтен ил Тольятти “АвтоВАЗ”ындагы вәзгыятьне тамырдан үзгәртү өстендә баш вата, диде Рөстәм Миңнеханов. “КамАЗ” ААҖ җитәкчелегенең эше тамырдан уйланган, төпле булмаган булса, Яр Чаллыда да вәзгыять Тольяттида кебек үк авыр булган булыр иде.

ТР Премьер-министры фикеренчә, шәһәр өчен төп мәсьәләләрнең берсе - хезмәт базарында тотрыклылыкны саклап калу. Хезмәт базарында кризиска каршы чаралар күрү федераль программасы кысаларында Татарстанда 300 меңнән артык кеше җәлеп ителгән, шуларның 80 меңе – Яр Чаллыда. 2010 елда бу программа дәвам иттерелергә тиеш.

Сессия барышында Рөстәм Миңнеханов балалар бакчаларындагы чиратлар һәм яңа мәктәпкәчә балалар учреждениеләренә кагылышлы сорауларга җавап бирде. ТР Премьер-министры Татарстанның зур шәһәрләре өчен хас булган бу проблеманы хәл итәргә кирәк, диде. Мондый күләмдә балалар бакчасын төзү бүген мөмкин түгел (озак һәм кыйммәт), инде төзелгән биналарны балалар бакчаларына әйләндерергә кирәк (мәгълүмат өчен: балалар бакчаларына юллама алу өчен чиратта бүген 8,8 мең чаллылы тора; 2010 елда 4,9 мең урын, ягъни кирәкле күләмнән 50% бирелергә тиеш).

Кичекмәстән хәл ителергә тиешле тагын бер программа – мәгариф системасын реформалаштыру, дип билгеләп үтте Рөстәм Миңнеханов. “Без мәгариф системасына булган мөнәсәбәтебезне үзгәртергә тиеш”, - диде ул. ТР Премьер-министры сүзләренчә, мәктәп тәмамлаучы балалар саны киләсе елларда югары уку йортларында булган урыннар саныннан икеләтә зур булачак. Укытучы елында мәгариф проблемасы аеруча актуаль (2010 ел Укытучы елы итеп игълан ителгән).

Рөстәм Миңнеханов укытучының роле мәгариф сыйфаты мәсьәләсендә төп фактор булып тора, дип билгеләп үтте.

Автошәһәр алдында торган проблемалар арасында ТР Премьер-министры шулай ук шәһәрдәге юлларны да атады (ул шәһәр җитәкчелеге аңа бу мәсьәләне хәл итү өчен ярдәм сорап мөрәҗәгать иткәнен искә төшерде). Актуаль мәсьәләләр арасында шулай ук халыкка транспорт хезмәтләрен күрсәтү дә бар (шәһәр транспорт паркын яңарту, пассажирларның льготалы категорияләренә хезмәт күрсәтү һ.б.).

Татарстан Премьер-министры шулай ук 2010 елда автосәнәгать предприятиеләре өчен (“КамАЗ” ААҖ, “Соллерс” ААҖ һ.б.) транспорт чараларын сатып алу федераль программасы эшен дәвам итәчәк дип искә төшерде. Ул әлеге программа кысаларында шәһәр транспорт паркын тулыландыру һәм яңарту мәсьәләсен карарга тәкъдим итте.

Моннан кала, Рөстәм Миңнеханов сүзләренчә, 2010 елда Бөек Ватан сугышында Җиңүнең 65-еллыгын оештыру һәм бәйрәм итү, сугыш ветераннарын (яшәү шартларын яхшырту чиратына 2005 елның 1нче мартына кадәр баскан кешеләр) торак белән тәэмин итү, муниципаль сайлаулар уздыру, шулай ук 2010 елның 14-25нче октябрендә узасы Бөтенроссия халык санын алу мәсьәләләренә дә игътибар юнәлтергә кирәк.

Бүген һәр сумны карап тотарга тиешбез, дип белдерде алга таба Рөстәм Миңнеханов. Ул электрон сәүдә системасын тагы да эффектив рәвештә кулланырга тәкъдим итте.

Моннан кала, ТР Премьер-министры фикеренчә, хәзерге шартларда республикада эшли торган җирле җитештерүчеләрнең товарларына өстенлек бирергә кирәк. Әлбәттә, бу бәя хакына булырга тиеш түгел, һәм барлык җитештерүчеләр дә бертигез шартларда эшләргә тиеш.

Предприятиеләр бүген үз продукциясен яңа базарларга тәкъдим итәргә омтыла. Алар өчен заманча, яңа, конкуренциягә сәләтле продукт җитештерү мөһим.

Яр Чаллы шәһәр Советының 46нчы сессиясендә 2009 елда эшләнгән эш турында доклад белән шәһәрнең башкарма комитет җитәкчесе Васил Шәехразиев чыгыш ясады.

Югары квалификацияле табибларның җитмәү мәсьәләсен депутат, Кама пресс-рама заводының профком рәисе Александр Васильев күтәреп чыкты.

Автошәһәрнең балалар бакчаларында урын җитмәү турында депутат, “Автоградбанк” идарәсе рәисе Венера Иванова белдерде.

Сессиядә шулай ук “КамАЗ” ААҖ генераль директоры Сергей Когогин, Яр Чаллы мэры Илдар Халиков чыгыш ясадылар.